الماتىلىق دارىگەرلەر نەگە ءتيىستى ۇستەماقىسىز قالعانى ءتۇسىندىرىلدى

الماتى قوعامدىق دەنساۋلىق باسقارماسىنىڭ باسشىسى تىلەۋحان ابىلدايەۆتىڭ ايتۋىنشا، قالادا ۇستەماقى تولەۋ اياقتالىپ قالدى. بۇل قاراجات مەديتسينالىق ساقتاندىرۋ قورىنان ءبولىندى.

ول بالالار جۇقپالى اۋرۋلار اۋرۋحاناسىنىڭ دارىگەرلەرى نەگە ۇستەماقى الماعانىن ءتۇسىندىردى.

«بۇيرىقتى تۇسىندىرۋدە بەلگىلى ءبىر قيىندىقتار بولدى. قازىر بۇل ماسەلە شەشىلىپ، دەنساۋلىق ساقتاۋ مينيسترلىگىمەن كەلىسىلدى. اتاپ ايتقاندا، قالالىق بالالار جۇقپالى اۋرۋلار اۋرۋحاناسى تاراپىنان قابىلداۋ بولمەسى، زەرتحانا، كلينيكالىق- دياگنوستيكالىق بولىمشە قىزمەتكەرلەرىنە قاتىستى تۇسىنىسپەۋشىلىك بولدى. ءقازىر اتالعان بولىمشەلەردىڭ بارلىق قىزمەتكەرى كوروناۆيرۋس جۇقتىرعاندارمەن تىكەلەي بايلانىستاعىلار بولعاندىقتان، ءبىرىنشى توپقا كىرگىزىلدى»، - دەدى ول.

ول سونداي-اق، ۇستەمە اقى تولەۋ كەزىندە سالىقتار ۇستالاتىنىن ايتتى.

«بۇعان دەيىن بولىنگەن سىياقىلاردىڭ وسى تولەمدەرگە قاتىسى جوق»، - دەپ تولىقتىردى ول.

قازىرگى تاڭدا الماتىدا 500 دەن استام دارىگەر، 1,7 مىڭ ورتامەديتسينا قىزمەتكەرى، 549 كىشى مەديتسينا قىزمەتكەرى جانە 764 وزگە دە دەنساۋلىق ساقتاۋ قىزمەتكەرى ءوز تولەمدەرىن الىپ جاتىر.

جالپى العاندا، 965 ميلليون تەڭگە سوماعا 3557 مەديتسينا قىزمەتكەرى تولەم الادى. ەسەپتەۋلەر 3 كۇردەلىلىك ساناتى بويىنشا جۇرگىزىلەدى.

بۇعان دەيىن الماتى قالالىق بالالار جۇقپالى اۋرۋلار اۋرۋحاناسىنىڭ دارىگەرلەرى دەنساۋلىق ساقتاۋ ءمينيسترى ەلجان ءبىرتانوۆقا حات جازعان بولاتىن. دارىگەرلەر ۇستەماقى تولەۋ كەزىندە ولاردى ءبىرىنشى ەمەس، ءۇشىنشى ساناتقا جاتقىزعاندارىنا شاعىمداندى.

ءبىرتانوۆ دارىگەرلەردى جاقتاپ، ماسەلەنى تۇزەۋدى تاپسىردى.

ەسكە سالايىق، قازاقستانداعى 26228 دارىگەرگە ۇستەماقى تولەنەدى. ماماندار ۆيرۋس جۇقتىرۋ قاۋپىنە بايلانىستى ءۇش توپقا ءبولىندى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى