اقتوبەدە كوروناۆيرۋس تابىلعان اداممەن بايلانىستا بولعانداردىڭ بارلىعى وقشاۋلاندىرىلدى

«قازىرگى تاڭدا اقتوبە وبلىسىندا كوروناۆيرۋس ينفەكسياسىنا بايلانىستى ەپيدەميولوگيالىق جاعداي تۇراقتى. بۇگىندە وبلىسىمىزدا ءبىر ناۋقاستا كوروناۆيرۋستىق ينفەكسيا انىقتالدى. ول ناۋقاس 22 - ناۋرىز كۇنى شەتەلدەن كەلگەن. ناۋقاستى بىردەن ينفەكسيالىق اۋرۋحاناعا وقشاۋلاعان ەدىك. زەرتحانالىق تەكسەرۋ بارسىندا تۇرعىنىمىزدان كوروناۆيرۋس ينفەكسياسى انىقتالدى. قازىرگى ۋاقىتتا ناۋقاستىڭ جاعدايى تۇراقتى. قاجەتتى ەمدىك ءىس- شارالار جۇرگىزىلىپ جاتىر. وسى ناۋقاسپەن بايلانىستا بولعان بارلىق تۇرعىنداردى وقشاۋلاۋ جۇمىسىن اياقتادىق» ، - دەدى اسەت قاليەۆ «حابار 24» تەلەارناسىنىڭ تىكەلەي ەفيرىنەن.

ونىڭ دەرەگىنشە، اقتوبە وبلىسىندا ستاتسيونارلىق كارانتيندە 68, ءۇي كارانتينىندە 38 تۇرعىن جاتىر. ولاردىڭ بارلىعىنىڭ جاعدايىن دارىگەرلەر كۇندەلىكتى باقىلاۋدا ۇستاپ وتىر. « ءبىز كوشەگە شىعۋدى، قوعامدىق ورىندارعا بارۋدى بارىنشا شەكتەۋ ارقىلى عانا دەنساۋلىعىمىزدى قورعاي الامىز. كوروناۆيرۋس ينفەكسياسىمەن كۇرەستىڭ ەڭ ءتيىمدى ءادىسى - ادامدار اراسىنداعى بايلانىستى مەيلىنشە ازايتۋ. ۇيىمداردىڭ، مەكەمەلەردىڭ، ۇلكەن ساۋدا ورىندارىنىڭ، ەمدەۋ مەكەمەلەرىنىڭ باسشىلارى سانيتارلىق نورمالاردى قاتاڭ ساقتاۋىمىز ءتيىس» ، - دەدى ول. ەسكە سالساق، كەشە اقتوبە وبلىسىندا كوروناۆيرۋس جۇقتىرۋدىڭ العاشقى وقيعاسى تىركەلگەنى تۋرالى حابارلاعان بولاتىنبىز.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى