قىرعىزستان كوروناۆيرۋسقا بايلانىستى توتەنشە جاعداي رەجيمىن ەنگىزبەك
اگەنتتىك مالىمەتىنشە، بۇگىن، 21- ناۋرىزدا قىرعىزستان پرەزيدەنتى سوورونباي جەەنبەكوۆتىڭ توراعالىعىمەن قاۋىپسىزدىك كەڭەسىنىڭ كەزەكتى وتىرىسى ءوتتى.
شاعىن قۇرامداعى وتىرىسقا مەملەكەتتىك ورگانداردىڭ باسشىلارى، ۇكىمەتتىڭ شۋ وبلىسىنداعى وكىلەتتى وكىلى، بىشكەك مەرى قاتىسقان.
پرەزيدەنت اپپاراتىنىڭ اقپاراتتىق ساياسات ءبولىمىنىڭ حابارلاۋىنشا، كوروناۆيرۋس ينفەكتسياسىنىڭ قىرعىزستان اۋماعىندا تارالۋىنىڭ الدىن الۋ بويىنشا قوسىمشا شارالار قارالعان. رەسپۋبليكالىق جەدەل شتاب باسشىسى قۋاتبەك بورونوۆ كوروناۆيرۋستىڭ ودان ارى تارالۋىنا جول بەرمەۋ ماقساتىندا بۇكىل ەل اۋماعىندا توتەنشە جاعداي رەجيمىن ەنگىزۋ تۋرالى ۇسىنىس ەنگىزگەن.
«بۇل ماسەلەنى تالقىلاۋ ناتيجەسىندە شاعىن قۇرامداعى قاۋىپسىزدىك كەڭەسى وتىرىسىنا قاتىسۋشىلاردىڭ ۇسىنىستارى ەسكەرىلە كەلە شەشىم قابىلداندى. اتالعان شەشىمگە سايكەس، قىرعىز رەسپۋبليكاسىنىڭ پرەمەر-ءمينيسترى 2020-جىلىدڭ 22- ناۋرىزىنان باستاپ ەل اۋماعىندا 1 اي مەرزىمگە توتەنشە جاعداي ەنگىزۋ تۋرالى ۇسىنىس جاسايدى. قىرعىز رەسپۋبليكاسى ۇكىمەتىنە قاۋىپسىزدىك كەڭەسى حاتشىلىعىمەن بىرگە توتەنشە جاعداي جاريالانعان جاعدايدا جەدەل ارەكەت ەتۋدىڭ ءتيىستى جوسپارىن ازىرلەۋ تاپسىرىلدى»، - دەپ جازادى اگەنتتىك.
