«ۋادە بەرەمىن»: مينيستر ءبىرتانوۆ وزىنە حات جازعان وقۋشىعا جاۋاپ بەردى
رايدا ەسىمدى قىزدىڭ جازۋىنشا، اناسى اسەم - دارىگەر. ەلدە توتەنشە جاعدايدىڭ جاريالانۋىنا بايلانىستى ونى تاۋلىك بويى كورمەيتىنىن ايتادى.
«ال كەشە مەنىڭ تۋعان كۇنىم بولدى. 13 كە تولدىم. ءبىراق مەنىڭ كوڭىل-كۇيىم بولمادى. سەبەبى مەن ءۇشىن ەڭ باستى ادام - انام جانىمدا بولمادى! ول ماڭىزدى ءارى قايىرىمدى ىسپەن اينالىسىپ جاتقانىن بىلەمىن. الايدا، ونى قاشان كورەتىنىمدى بىلمەيمىن... ول ءۇشىن وتە ۋايىمدايمىن. ول سىرقاتتانىپ قالا ما دەپ قورقامىن. ول ۇيگە ورالماي ما دەپ ۇرەيلەنەمىن... ەلجان امانتاي ۇلى، ءسىزدىڭ دە وتباسىڭىز بار. قولىڭىزدان كەلگەننىڭ بارلىعىن جاساڭىزشى. بۇدان-بىلاي ەشكىم اۋىرمايتىنداي ەتىپ، انام تەزىرەك ۇيگە ورالسىنشى. بۇل - مەن ءۇشىن ەڭ ۇلكەن سىيلىق بولار ەدى»، - دەپ جازدى ول.
«سالەمەتسىڭ بە، قۇرمەتتى رايدا! سەنىڭ حاتىڭدى ينتەرنەتتەن وقىدىم. جۇرەگىڭنەن شىققان شىنايى جىلى سوزدەر ءۇشىن ريزاشىلىعىمدى بىلدىرەمىن! بىرىنشىدەن، ءوتىپ كەتكەن تۋعان كۇنىڭمەن قۇتتىقتايمىن! زور دەنساۋلىق تىلەيمىن! جاسىڭا قاراماستان، اناڭنىڭ ماماندىعى قانشالىقتى ماڭىزدى ەكەندىگىن تۇسىنەتىنىڭە سۇيسىنەمىن. دارىگەر بولۋ - بۇل اۋا رايىنا قاراماستان، اپتانىڭ قاي كۇنى، قانداي ۋاقىت بولماسىن جانە كوپ جاعدايدا ءوزىڭنىڭ شارشاعانىڭا، دەنساۋلىعىڭا قاراماستان كومەككە ۇمتىلۋعا شىنايى نيەت»، - دەپ جازدى مينيستر Facebook-تەگى پاراقشاسىندا.
ەلجان ءبىرتانوۆتىڭ جازۋىنشا، وقۋشى قىزدىڭ حاتىنان بۇگىندە تىنباي ەڭبەك ەتىپ جاتقان قازاقستانداعى جانە بۇكىل الەمدەگى مەديتسينا ماماندارىنىڭ بالالارىنىڭ داۋىسىن ەستۋگە بولادى.
«ءبىز، ارىپتەستەرىمىزبەن - ءوزىڭ سياقتى بالالاردىڭ اناسى جانە اكەلەرىمەن بىرگە ناۋقاستانعان ادامدار سانى نەعۇرلىم از بولۋى ءۇشىن جانە بۇكىل عالامشاردا كوروناۆيرۋس ىندەتىنىڭ تارالۋىن توقتاتۋعا بار كۇش-جىگەرىمىزدى سالىپ جاتىرمىز... اناڭ ەكەۋىڭ تۋعان كۇنىڭدى جاقىن ۋاقىتتا بىرگە اتاپ ءوتۋ ءۇشىن قولدان كەلگەندى جاساۋعا ۋادە ەتەمىن. كوڭىل-كۇيىڭدى تۇسىرمە! بارلىعى جاقسى بولادى!»، - دەپ جازدى دەنساۋلىق ساقتاۋ ءمينيسترى.
ۆەدومستۆو باسشىسى وقۋشى قىزعا ۇيدە وتىرعاندا گيگيەنا تالاپتارىن ورىنداۋعا جانە كوبىرەك كىتاپ وقۋعا كەڭەس بەردى. سونداي-اق تۋعان كۇنىنە بىرنەشە كىتاپتى سىيعا تارتاتىنىن جەتكىزدى.
