ەلباسى بيزنەس يەلەرىنە: سىزدەر جۇمىس ورىندارىن ساقتاۋ ارقىلى قوعامعا قامقورلىق كورسەتەسىزدەر
«كومپانيا يەلەرى وزدەرىنىڭ قول استىندا ەڭبەك ەتىپ جۇرگەن جاندارعا قارجىلاي دا، مورالدىق تۇرعىدان دا جاردەمدەسەدى دەپ سەنەمىن. ماسەلەن، ۋاقىتشا دەمالىسقا جىبەرۋگە ءماجبۇر بولعان جاعدايدا ەڭبەككەرلەردى اقىلى تۇردە بوساتقان نەمەسە قىسقارتىلعان جۇمىس كەستەسىنە كوشكەن ابزال. وتاندىق بيزنەس وكىلدەرىن جالدامالى قىزمەتكەرلەردى جۇمىستان شىعارماۋعا شاقىرامىن. سىزدەر جۇمىس ورىندارىن ساقتاۋ ارقىلى قوعامعا قامقورلىق كورسەتەسىزدەر»، - دەپ اتاپ ءوتتى قازاقستاننىڭ تۇڭعىش پرەزيدەنتى.
ونىڭ ايتۋىنشا، قازىرگى ۋاقىتتا ەڭ اۋەلى اسا مۇقتاج جاندارعا كومەك كورسەتۋ كەرەك.
«مەنىڭ تاپسىرماممەن «Nur Otan» پارتياسىنىڭ جوبالارى اياسىندا 150 ميلليون تەڭگە ءبولىندى. بۇل قاراجات كارانتين جاريالانعان نۇر-سۇلتان جانە الماتى قالالارىنداعى الەۋمەتتىك جاعدايى تومەن ازاماتتارعا اتاۋلى كومەك كورسەتۋگە جۇمسالادى. كوروناۆيرۋس ينفەكتسياسىنىڭ تارالۋىنا جول بەرمەۋ ءۇشىن مەنىڭ شەشىممەن تۇڭعىش پرەزيدەنت قورى ەسەبىنەن تاعى 200 ميلليون تەڭگە ءبولىندى. جالپى، كوروناۆيرۋسقا قارسى كۇرەسكە ارنالعان قاراجاتتىڭ دۇرىس جۇمسالۋىن «Nur Otan» پارتياسى باقىلاۋىندا ۇستايدى دەپ ويلايمىن»، - دەيدى ەلباسى.
نۇرسۇلتان نازاربايەۆ ۇلكەن كىسىلەردى، بالالار ءۇيى تاربيەلەنۋشىلەرى مەن ارناۋلى اۋرۋحانالارداعى ناۋقاستاردى قاجەتتى زاتتارمەن ۇزبەي قامتاماسىز ەتۋگە باسا كوڭىل بولگەن ءجون ەكەنىن ايتتى.
ەلىمىزدىڭ كومەككە مۇقتاج ءاربىر ازاماتىنا قامقورلىق كورسەتىلۋگە ءتيىس.
«قازاقستاندىقتار قيىن كەزەڭدە ءاردايىم ءبىر-بىرىنە جاردەمدەسكەن. بۇل ىسكە ەرىكتىلەر قوزعالىسىنىڭ وكىلدەرى دە اتسالىسادى دەپ سەنەمىن. سونداي-اق، ءبىز پاندەميامەن كۇرەستىڭ «الدىڭعى شەبىندە» جۇرگەن دارىگەرلەر مەن مەدبيكەلەردى، قۇقىق قورعاۋ ورگاندارى مەن اسكەري قىزمەتكەرلەردى قولداۋىمىز كەرەك. ولاردىڭ يىعىنا اۋىر جۇك ءتۇسىپ، زور جاۋاپكەرشىلىك ارتىلىپ وتىر. جۇرتشىلىقتىڭ ولارعا كومەكتەسىپ، تۇسىنىستىك تانىتۋعا جانە بارلىق نۇسقاۋىن جاۋاپكەرشىلىكپەن ورىنداۋعا تىرىسقانى ءجون»، - دەپ اتاپ ءوتتى نۇرسۇلتان نازاربايەۆ.
