ىشكى ىستەر ءمينيسترى قالالاردىڭ كارانتينگە جابىلۋىنا قاتىستى ۇندەۋ جاسادى
«بۇگىن تۇندە، ياعني 19 - ناۋرىزدان باستاپ الماتى مەن نۇر- سۇلتان قالالارىندا كارانتين ەنگىزىلەدى. وسىعان وراي ۆيرۋس تاراماۋى ءۇشىن جەرگىلىكتى اكىمدىكتەر جابىلاتىن ورىنداردى بەلگىلەپ، قالالارعا كىرىپ- شىعۋ ماسەلەسىن پىسىقتاپ جاتىر. ول تۋرالى قوسىمشا حابارلانادى. ال ازىرگە پوليتسيا قىزمەتكەرلەرى قالاعا كىرەتىن بارلىق جولدى باقىلاۋ الدى. الماتى بويىنشا 27 بلوك پوست قويىلدى. 900-دەن استام پوليتسيا مەن اسكەري قىزمەتشى شىقتى. نۇر- سۇلتان بويىنشا جەتى بلوك پوست قويىلىپ، 500-دەن اسا قىزمەتكەر جۇمىسقا كىرىسەدى. سونىمەن بىرگە، بەكەتتەردە سانيتارلىق دارىگەرلەر، جەرگىلىكتى اتقارۋشى ورگاندارىنىڭ وكىلدەرى قىزمەت اتقارادى»، - دەدى ەرلان تۇرعىمبايەۆ «حابار 24» ارناسىنان تىكەلەي ەفيردەن سويلەگەن سوزىندە.
مينيستر ءوز سوزىندە اۆتوكولىكتەر مەن ادامداردىڭ قوزعالىسىنا شەكتەۋ ەنگىزىلەتىنىن ءمالىم ەتتى. اقمولا جانە الماتى وبلىستارىنىڭ اۋماعىندا پوستقا جەتپەس بۇرىن قوسىمشا اۆتوپاترۋل ەكيپاجدارى قويىلادى. ولار وتكىزۋ پۋنكتەرىندە كولىكتەردىڭ كوپ جينالىپ قالماۋىنا بايلانىستى ءتۇسىندىرۋ جۇمىستارىن جۇرگىزەدى.
كارانتيندىك شەكتەۋلەر كەلەسى ازاماتتارعا قولدانىلمايدى. ولار: بۇرىن شىعىپ كەتكەن نۇر- سۇلتان جانە الماتى قالالارىنىڭ تۇرعىندارى. ءبىراق ولار 22 - ناۋرىز كۇنى تۇنگى ساعات 00.00 ۋاقىتىنا دەيىن ورالۋى كەرەك. سونىمەن بىرگە شەتەلدەن قازاقستانعا قايتقان ازاماتتارعا اتالمىش شەكتەۋ قويىلمايدى. باسقا وڭىرلەردىڭ تۇرعىندارى 22 - ناۋرىز كۇنى ساعات 00.00 ۋاقىتىنا دەيىن شىعىپ كەتۋى كەرەك.
ترانزيتپەن نەمەسە اۋە كولىگىمەن كەتۋگە نيەتتى ازاماتتارعا دا شەكتەۋ ەنگىزىلمەيدى. شەتەلگە ەمدەلۋگە كەتىپ بارا جاتقان ازاماتتارعا دا شەكتەۋ بولمايدى. ءبىراق ولاردا راستايتىن قۇجات بولۋى ءتيىس. شەتەلدىك مەملەكەتتەردىڭ ديپلوماتيالىق قىزمەتىنىڭ پەرسونالدارى مەن ولاردىڭ وتباسى مۇشەلەرىنە دە شەكتەۋ قويىلمايدى. پويىز جانە لوكوموتيۆ بريگادالارىنىڭ مۇشەلەرىنە، اۋە كەمەلەرىنىڭ ەكيپاج مۇشەلەرىنە، حالىقارالىق باعىتتا جۇرەتىن جۇك كولىكتەرىنىڭ جۇرگىزۋشىلەرىنە، قالا ماڭىندا تۇرىپ، نۇر- سۇلتان مەن الماتىدا جۇمىس ىستەيتىن تۇرعىندارعا، سونداي- اق اتالعان قالالاردا تۇرىپ الماتى مەن اقمولا وبلىسىندا جۇمىس ىستەيتىن ادامدارعا دا شەكتەۋ ەنگىزىلمەيدى»، - دەدى ول.
بۇل رەتتە مينيستر ازىق- تۇلىك، ءدارى- دارمەك تاسيتىن كولىكتەرگە قالاعا كىرۋگە تىيىم سالىنبايتىنىن مالىمدەدى.
«قازاقستان تاريحىندا مۇنداي شارالار ءبىرىنشى رەت ءوتىپ جاتىر. سول ءۇشىن ادامدار بۇل جاعدايدى سابىرمەن قابىلداۋى كەرەك. ءقازىر ءبىزدىڭ قوعام بىرلىك پەن تۇسىنىستىك ەمتيحانىنان ءوتىپ جاتىر. حالىقارالىق تاجىريبە تولىققاندى وقشاۋلىقتىڭ جەمىستى ناتيجەگە جەتكىزەتىنىن كورسەتىپ وتىر»، - دەدى ول.
اۆتور: ايان بەكەن ۇلى
