كوروناۆيرۋس: دەزينفەكسيا جۇمىستارىنا ق ر قارۋلى كۇشتەرى جۇمىلدىرىلدى
بۇل تۋرالى ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا ايتىلدى، دەپ حابارلايدى قازاقپارات ءتىلشىسى.
«ق ر قارۋلى كۇشتەرىنىڭ جەكە قۇرامى توتەنشە جاعدايدى قامتاماسىز ەتۋگە بەلسەندى قاتىسۋدا. مەملەكەت باسشىسى ازاماتتاردىڭ دەنساۋلىعىن قورعاۋ جانە زاڭدى قۇقىقتارىن ساقتاۋ تۋرالى تاپسىرما بەردى. الدىن الا ازىرلىك قاجەتتى كۇشتەر مەن قۇرالداردى موبيليزاتسيالاۋعا جانە دايىندىق كۇيىنە كەلتىرۋگە مۇمكىندىك بەردى. كوروناۆيرۋس ينفەكسياسىنىڭ تارالۋ قاۋپىنىڭ الدىن الۋ ءۇشىن قارۋلى كۇشتەردىڭ بيولوگيالىق قورعاۋ بولىمشەسى ارنايى تەحنيكانى قولدانا وتىرىپ تەرريتوريالار مەن نىساندارعا دەزينفەكسيا جاساۋعا كىرىستى»، - دەيدى ق ر قورعانىس ءمينيسترىنىڭ ورىنباسارى تيمۋر داندىبايەۆ.
ول اسكەري مەديتسينالىق مەكەمەلەر ازاماتتاردىڭ دەنساۋلىعىن قورعاۋ ءۇشىن قاجەتتى كومەك كورسەتۋگە دايىن ەكەنىن ايتتى.
«بۇل ءۇشىن دارىگەرلىك 24 توپ قۇرىلدى. ق ر دەنساۋلىق ساقتاۋ مينيسترلىگىمەن بايلانىس ورناتىلدى. اسكەري قىزمەتشىلەر ىشكى ىستەر ورگاندارىمەن بىرلەسىپ ەلدى مەكەندەر مەن نۇر- سۇلتان، الماتى قالالارىنداعى كارانتيندى اۋماقتاردا بلوك- پوستتاردى كۇزەتۋدە. بۇل شارالار كوروناۆيرۋستىڭ ەلىمىزدە تارالۋىنىڭ الدىن الادى. قارۋلى كۇشتەر قولداناتىن شارالارعا تۇسىنىستىكپەن قاراۋعا شاقىرامىز»، - دەيدى ول.
