كارانتين: نۇر- سۇلتاندا قاداعالاۋ بەكەتتەرى قاي جەرلەرگە قويىلادى
«نۇر- سۇلتان قالاسىنا اۆتوكولىك قۇرالدارىنىڭ كىرۋىنە جانە شىعۋىنا شەكتەۋ ەنگىزىلدى. قالاعا كىرەتىن بارلىق جەرلەر جابىلىپ، 6 ارنايى قاداعالاۋ بەكەتى قويىلدى. ولاردا تاۋلىك بويى قورعانىس مينيسترلىگىنىڭ اسكەرلەرىمەن بىرگە پوليسيا قىزمەتكەرلەرى جۇمىس ىستەيدى. بۇل بەكەتتەر ەلوردا ماڭىنداعى جىبەك جولى، قوسشى، تالاپكەر، قاراوتكەل، قوياندى اۋىلدارىنىڭ ماڭىندا ورنالاسقان» ، - دەدى دەپارتامەنت باسشىسى ورتالىق كوممۋنيكاتسيالار قىزمەتىندە.
سونىمەن بىرگە، الماتى، كوكشەتاۋ، قوستاناي، پاۆلودار قالالارى مەن اقمولا وبلىسىنىڭ قورعالجىن جانە قابانباي باتىر اۋىلدارى سىندى بارلىق باعىتتا حالىقتىڭ قوزعالىسى شەكتەلەدى. «بۇعان دەيىن قالا اۋماعىنان شىعىپ كەتىپ، قايتا ورالعان نۇر- سۇلتان قالاسىنىڭ تۇرعىندارىنا عانا باسىمدىق بەرىلەدى» ، - دەدى ە. سادەنوۆ. بۇعان دەيىن كارانتين جاريالانعان نۇر- سۇلتان مەن الماتى قالالارىنا بلوكپوستتار قويىلىپ، كولىك پەن ازاماتتاردىڭ قوزعالىسى شەكتەلەتىنى حابارلانعان ەدى. ەكى مەگاپوليسكە تۇرعىلىقتى جەرلەرى بويىنشا تىركەۋدە تۇرعان ادامدار جانە قالالاردىڭ ومىرلىك قىزمەتتەرىن قامتاماسىز ەتۋ سالاسىنىڭ ماماندارى عانا كىرەدى. ءتىزىمدى اكىمدىكتەر انىقتايدى.
