مۇناي باعاسىنىڭ قۇلدىراۋى قازاقستان ەكونوميكاسىنا قالاي اسەر ەتەدى
مۇناي باعاسى نارىعىندا ۇلكەن تولقىنىس بولۋدى. مۇنايدى ءىرى كولەمدە تۇتىناتىن قىتاي مەملەكەتى كوروناۆيرۋس ىندەتىنە بايلانىستى سۇرانىستى اۋقىمدى مولشەردە ازايتىپ تاستادى. وعان قوسا، مەملەكەتارالىق اۋە قاتىناستارىنا، سۋدا جۇزەتىن تانكەرلەرگە قويىلىپ جاتقان شەكتەۋلەر دە اسەرىن تيگىزۋدە. ەنگىزىلىپ جاتقان كارانتينگە بايلانىستى اۆتوكولىكتەرگە سۇرانىستىڭ ازايۋى دا مۇنايعا دەگەن سۇرانىسقا ءسوزسىز كەرى ىقپالىن تيگىزۋدە» ، - دەدى راشيت جاقسىلىقوۆ بۇگىن ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
وداق ءتوراعاسىنىڭ ايتۋىنا قاراعاندا، مۇناي ءوندىرۋشى مەملەكەتتەردىڭ ساۋدا «سوعىسى» نارىقتى شيەلەنەستىرىپ جىبەرگەن. «جوعارىداعى دەرەكتەرگە سۇيەنە وتىرىپ، 2020 -جىلى مۇنايعا دەگەن سۇرانىستىڭ وتە تومەن بولاتىنىن بولجاۋعا بولادى. مۇناي باعاسىنىڭ جاعدايى جاقىن ارادا وڭالادى دەپ ايتۋ وتە قيىن. ءبىزدىڭ بولجامىمىز بويىنشا مۇنايعا قاتىستى جاعداي 1-2 جىلعا سوزىلۋى ابدەن مۇمكىن» ، - دەدى ول.
راشيت جاقسىلىقوۆ تەك قازاقستاننىڭ عانا ەمەس، بۇكىل دۇنيەجۇزىنىڭ ەكونوميكاسى سىن ساعاتتا تۇرعانىن ايتادى. «ءبىزدىڭ مەملەكەت ءۇشىن بۇل جاعداي نەسىمەن اۋىر بولادى؟ ەلىمىز بيۋدجەتىنىڭ نەگىزگى كىرىسىن قامتاماسىز ەتىپ وتىرعان مۇناي جانە گاز ءوندىرۋشى مەكەمەلەر. ولاردىڭ بيۋدجەتكە تۇسىرەتىن تۇسىمدەرى: ۇلتتىق قورعا قۇيىلاتىن ترانسفەر 3,4 تىريلليون تەڭگە، ساتىلعان ونىمگە سالىناتىن باج كىرىسى - 1 تىريلليون تەڭگە. ەگەر مۇناي باعاسى 25 دوللارعا تۇسسە باجدىق الىم تولەنبەيدى. مۇنايعا قىزمەت كورسەتۋ سالاسىنىڭ بيۋدجەتكە بەرىپ وتىرعان قارجىسى - 500 ميلليارد تەڭگەنى قۇرايدى. مۇناي باعاسى بۇگىنگى كورسەتكىشتە قالا بەرەتىن بولسا، كىرىس ءۇش ەسە ازايادى. بيۋدجەتتىڭ ىشكى اينالىم تاپشىلىعى 1,2 پايىزدى قۇرايدى. وزدەرىڭىز كورىپ وتىرعانداي قوماقتى قاراجات ەلىمىزدىڭ بيۋدجەتىنە تۇسپەيدى» ، - دەدى ول.
