داريعا نازاربايەۆا: دۇرلىكتىرۋشىلەر مەن ارانداتۋشىلار - كوروناۆيرۋس سياقتى ءبىزدىڭ دۇشپانىمىز
«ەلىمىزدىڭ پرەزيدەنتى ق. ك. توقايەۆ ەنگىزگەن توتەنشە جاعداي - ۋاقتىلى جانە قاجەتتى شارا. ءبىزدىڭ ورتاق ماقساتىمىز - كوروناۆيرۋس ينفەكتسياسىنىڭ تارالۋىمەن كۇرەسۋ، ونىڭ قازاقستان ەكونوميكاسىنا جانە ادامداردىڭ ومىرىنە تەرىس ىقپال ەتۋىنىڭ الدىن الۋ. بارلىق مەملەكەتتىك قىزمەتتەر، اكىمدىكتەر ازاماتتاردىڭ قاۋىپسىزدىگىن قامتاماسىز ەتۋگە جانە حالىقتى بارلىق قاجەتتى زاتتارمەن ۇزدىكسىز قامتاماسىز ەتۋ ماسەلەسىن شەشۋگە جۇمىلدىرىلعان. قازىرگى ۋاقىتتا مەديتسينا قىزمەتكەرلەرىنە بارىنشا كومەك پەن قولداۋ كورسەتۋ قاجەت - ولار وسى اۋرۋمەن كۇرەستىڭ الدىڭعى قاتارىندا، ادامداردىڭ ءومىرى مەن دەنساۋلىعى ولاردىڭ كاسىبيلىگى مەن جاۋاپكەرشىلىگىنە بايلانىستى»، - دەپ اتاپ وتەدى سەنات ءتوراعاسى.
ونىڭ اتاپ وتۋىنشە، قۇقىق قورعاۋ ورگاندارىنىڭ ارەكەتتەرىنە جانە توتەنشە جاعدايلار كەزىندەگى ازاماتتاردىڭ ءتارتىبى مەن قاۋىپسىزدىگىن قامتاماسىز ەتۋ قاجەتتىلىگىنە بايلانىستى شەكتەۋلەرگە تۇسىنىستىكپەن قاراۋىمىز كەرەك. مەملەكەتتىك ورگانداردىڭ مىندەتى - پاندەميا جانە ونىمەن كۇرەسۋ بويىنشا جۇرگىزىلىپ جاتقان شارالار تۋرالى اقپاراتتىڭ بارىنشا اشىقتىعى مەن سەنىمدىلىگىن قامتاماسىز ەتۋ.
«ۇرەيلى كوڭىل كۇي، قاۋەسەت پەن جالعان اقپارات تاراتۋعا ءۇزىلدى-كەسىلدى توقتاۋ سالۋ كەرەك. دۇرلىكتىرۋشىلەر مەن ارانداتۋشىلار - كورونوۆيرۋستىڭ ءوزى سياقتى ءبىزدىڭ دۇشپانىمىز. پاندەميامەن كۇرەسۋدەگى ءبىزدىڭ ورتاق جەتىستىگىمىز، ءبىرىنشى كەزەكتە، بۇكىل قوعامنىڭ، ەلىمىزدىڭ بارلىق ازاماتتارىنىڭ، بىزدەردىڭ، قازاقستاندىقتاردىڭ جاۋاپكەرشىلىك ۇستانىمىنا بايلانىستى. تىنىشتىقتى، ءتارتىپتى، گيگيەنانى ساقتاۋ، وقشاۋلانۋ، وزىڭىزگە جانە جاقىن ادامدارىڭىزعا قامقورلىق جاساۋ - ۆيرۋسپەن كۇرەسۋدىڭ باستى قۇرالى. بۇگىن بارىمىزگە ىنتىماقتاستىق جانە ءوزارا جاۋاپكەرشىلىك پەن كومەك قاجەت. ءوزىڭىزدى جانە جاقىن ادامدارىڭىزدى كۇتىڭىزدەر. ءبارىمىز بىرگە جەڭەمىز!»، - دەدى داريعا نازاربايەۆا.
