ەلىمىزدىڭ ەڭبەك نارىعىنىڭ تۇراقتىلىعىنا قاۋىپ بار - مينيستر
بۇل تۋرالى ۇكىمەت وتىرىسىندا ق ر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ايتتى، دەپ حابارلايدى قازاقپارات ءتىلشىسى.
«وسى كۇنگە دەيىنگى ەڭبەك نارىعى جاعدايى تۇراقتى بولعانىمەن، سىرتقى نارىقتا قالىپتاسىپ جاتقان فاكتورلارعا بايلانىستى ەلىمىزدىڭ ەڭبەك نارىعىنىڭ تۇراقتىلىعىنا قاۋىپ تۋۋ تاۋەكەلى بولجانادى. ونىڭ ىشىندە جۇمىسكەرلەردىڭ بوساتىلۋ مۇمكىندىگى، جاڭا قۇرىلاتىن جۇمىس ورىندارىنىڭ ازايۋى، جۇمىسسىزدىق دەڭگەيىنىڭ ءوسۋى بار. ەلىمىزدە وسىنداي كەرى اسەرلەردى بولدىرماۋ ماقساتىندا جاپپاي جاڭا جۇمىس ورىندارىن قۇرۋعا باعىتتالعان داعدارىسقا قارسى جاڭا شارالاردى قامتيتىن جول كارتاسى ازىرلەنىپ جاتىر»، - دەدى مينيستر.
ونىڭ اتاپ وتۋىنشە، جول كارتاسىندا 2009-2010 -جىلدارى وڭ ناتيجەسىن بەرگەن، جۇمىسسىزدار سانىنىڭ وسپەۋىنە اسەر ەتكەن الەۋمەتتىك ينفراقۇرىلىمدىق جوبالاردى ىسكە اسىرۋ شارالارى كوزدەلەدى.
«بىرىنشىدەن - الەۋمەتتىك- مادەنيەت نىساندارىن، ياعني، ءبىلىم بەرۋ، دەنساۋلىق ساقتاۋ، الەۋمەتتىك قامسىزداندىرۋ، مادەنيەت، سپورت، ويىن- ساۋىق جانە دەمالىس نىساندارىن قايتا قۇرىلىمداۋ، كۇردەلى جانە اعىمداعى جوندەۋ. ەكىنشىدەن - تۇرعىن ءۇي- كوممۋنالدىق شارۋاشىلىق نىساندارىن جاڭعىرتۋ، كۇردەلى، ورتاشا جانە اعىمداعى جوندەۋ. بۇل - سۋمەن قامتۋ، كارىز نىساندارى، گازبەن، جىلۋمەن، ەلەكترمەن جابدىقتاۋ جۇيەلەرى»، - دەدى ول.
ءمينيستردىڭ ايتۋىنشا، ۇشىنشىدەن ينجەنەرلىك- كولىك ينفراقۇرىلىمىن جاڭعىرتۋ، كۇردەلى، ورتاشا جانە اعىمداعى جوندەۋ جوبالارى قولعا الىنادى. وعان قالالىق اۆتوموبيل جولدارى، كەنتىشىلىك جانە اۋىلىشىلىك جولدار، كىرمە جولدار، اۋداندىق ماڭىزى بار جولدار، تروتۋارلار، بوگەتتەر، دامبالار مەن كوپىرلەر جوندەۋ كىرەدى. تورتىنشىدەن ەلدى مەكەندەردى اباتتاندىرۋ جۇرگىزىلەدى.
«اتالعان ينفراقۇرىلىمدىق جوبالاردىڭ تىزبەسىن جانە جاڭعىرتۋ سۇرانىسىن «اتامەكەن» ۇلتتىق كاسىپكەرلەر پالاتاسى جۇرگىزگەن وڭىرلەردىڭ پروبلەمالىق ماسەلەلەرىنىڭ سكرينينگى نەگىزىندە انىقتاۋ ۇسىنىلادى»، - دەدى ءبىرجان نۇرىمبەتوۆ.
اۆتور: مارلان جيەمباي
