اتىراۋدا ەرىكتىلەر ۇلتتىق ناقىشتا مەديتسينالىق ماسكا تىگۋدى باستادى
بۇل يدەيانى ىسكە اسىرۋشى - «Assyl collection» اتەلەسىنىڭ نەگىزىن قالاۋشى، ءساندى كيىمدەر ديزاينەرى اسىل دۇزبايەۆا.
«ءدارىحانالارداعى ماسكا تاپشىلىعى تۋرالى ەستىپ، ونى ءوزىمىز تىكسەك دەگەن ويعا بەكىندىك. ءبىز بارلىق ەرىكتىلەردى وسىنداي ىسكە اتسالىسۋعا شاقىرىپ، چەللەندج باستادىق. كەشكە دەيىن بارلىق تاپسىرىستى توقتاتىپ قويىپ، كەم دەگەندە 40 ماسكا تىگۋدى كوزدەدىك. بۇل - بىرنەشە قاباتى بار، كوپ رەت قولدانىلاتىن ماسكا. ونى جۋىپ، قايتا قولدانا بەرۋگە بولادى. سوندىقتان، ادەمى كورىنۋى ءۇشىن ماسكانى ۇلتتىق ويۋمەن بەزەندىرۋدەمىز» - دەدى اسىل دۇزبايەۆا.
ول دايىن ماسكانى كوپبالالى وتباسىلارعا تەگىن تاراتۋدى جوسپارلاپ وتىر. ال، ونى ساتىپ الامىن دەۋشىلەرگە قارسىلىق بىلدىرمەيدى. ساۋدادان تۇسكەن كىرىستى قايىرىمدىلىق شاراسىنا جۇمساماق. كومەكتى قاجەت ەتەتىندەردىڭ ءتىزىمىن وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنان، ءارتۇرلى قورلاردان الادى.
«اركىم بۇل ىندەتكە قارسى كۇرەستى وزىنەن باستاۋى كەرەك. ازاماتتىق ورتالىقتىڭ كومەگىمەن ماسكا تىگۋ ىسىنە اتىراۋ قالاسىنداعى ەرىكتىلەردى، «ىسكەر انا» جوباسىنا قاتىسۋشىلاردى تارتىپ وتىرمىز» - دەدى اسىل دۇزبايەۆا.
ال، «ىسكەر انا» جوباسىنا قاتىسىپ، تىگىن ىسىنە ماشىقتانعان ايگەرىم بەكسۇلتانوۆا كوروناۆيرۋس ىندەتىنىڭ الدىن الۋ ءۇشىن اكتسياعا اتسالىسۋدى پارىزى سانايدى.
«جۇقپالى ىندەتتىڭ زاردابى اۋىر ەكەنىن ءبىلىپ وتىرمىز. ودان قورعانۋعا سەپ بولار جوبا تۋرالى ەستىپ، ودان شەت قالا المادىم. بۇل - قوعام ءۇشىن پايدالى ءىس. سول سەبەپتەن، مەن دە ءوز ۇلەسىمدى قوسقىم كەلدى» - دەدى ول.
اۆتور: جولداسبەك كوشەرباي ۇلى
