توتەنشە جاعداي كەزىندە كىمدەر قاشىقتان جۇمىس ىستەيدى جانە جالاقىسى قالاي تولەنەدى
كوروناۆيرۋس پاندەمياسىنا بايلانىستى ەلىمىزدە توتەنشە جاعداي جاريالانىپ، كوپتەگەن مەكەمەلەر مەن كاسىپورىنداردىڭ جۇمىسىنا شەكتەۋ قويىلىپ، كەيبىرەۋلەرى جۇمىسىن توقتاتۋعا ءماجبۇر بولادى.
«جۇمىسشىلاردىڭ جۇمىس ىستەۋ رەجيمى دە وزگەرەدى. وسىعان قاتىستى بۇگىن مەن بۇكىل جۇمىس بەرۋشىلەرگە وزدەرىنىڭ جۇمىسشىلارىنىڭ الدىندا ۇلكەن الەۋمەتتىك جاۋاپكەرشىلىك تانىتىپ جانە ەڭبەك زاڭدىلىعىن تولىق ساقتاۋعا شاقىرامىن. جۇمىس ىستەپ جۇرگەن ازاماتتاردىڭ وزدەرىنىڭ ەڭبەك قۇقىقتارىن ءبىلۋى قاجەت. وسىعان قاتىستى كىشكەنە تۇسىنىكتەمە بەرىپ كەتەيىن. بىرىنشىدەن، بۇگىنگى تاڭدا بارلىق كاسىپورىندار، مەكەمەلەر قاشىقتان جۇمىس ىستەۋگە مۇمكىندىگى بولسا، قاشىقتان جۇمىس ىستەۋ رەجيمىنە كوشۋگە مىندەتتى. بۇل ەڭبەك كودەكسىنىڭ 138-بابىمەن رەتتەلەدى»، - دەدى مينيستر.
قاشىقتان جۇمىس ىستەۋ رەجيمىندە ەڭبەكاقى قالاي تولەنەتىنى تۋرالى ءتۇسىندىرىپ ءوتتى.
«قاشىقتان ىستەۋ رەجيمىنە كوشكەن كەزدە جۇمىستىڭ ەڭبەك اقىسى وزگەرمەيدى. بۇل جەردە ازامات تەك ءوزىنىڭ جۇمىس ورنىندا ەمەس، ۇيدەن جۇمىس ىستەۋ مۇمكىندىگى بولادى. ەڭبەك كودەكسى بويىنشا وعان جۇمىس بەرۋشى ءتيىستى جاعداي جاساۋعا مىندەتتى جانە جالاقىسى اتقارىلعان جۇمىس بويىنشا ءوزىنىڭ اي سايىنعى الىپ جۇرگەن ايلىق كولەمىندە تولەنەدى»، - دەدى ءبىرجان نۇرىمبەتوۆ.
ايتۋىنشا، جۇمىس كولەمى شەكتەلەتىن بولسا، جۇمىس بەرۋشىلەر وزدەرىنىڭ بۇيرىعىمەن قىسقارتىلعان جۇمىس رەجيمىنە كوشۋگە قۇقىلى.
«بۇل دەگەنىمىز اپتاسىنداعى جۇمىس كۇندەرىنىڭ سانى ازايۋى مۇمكىن نەمەسە 1 كۇندە اتقارىلاتىن جۇمىس ساعاتى ازايۋى مۇمكىن. نەمەسە جۇمىس كۇنىمەن بىرگە ساعاتى دا ازايۋيى مۇمكىن. بۇل جاعدايدا جۇمىس ىستەپ جۇرگەن ازاماتتار جالاقىسىن سول اتقارىلعان جۇمىس ۋاقىتىنا ساي الادى. مىسالى، ەگەر اپتاسىنا جۇمىس كۇنى 5 كۇننەن 3 كۇنگە قىسقارسا، اپتاسىنا 3 كۇندىك جۇمىستىڭ جالاقىسىن الادى. ەگەر ءبىر كۇندە 8 ساعاتتىڭ ورنىنا 4 ساعات جۇمىس ىستەسە، 4 ساعاتتىڭ جالاقىسىن الادى. تولىق ەمەس جۇمىس كۇنى ەڭبەك كودەكسىنىڭ 70-بابىمەن رەتتەلەدى»، - دەپ ءتۇسىندىرىپ ءوتتى.
اۆتور: د. دوسپان
www.24.kz
