قازاقستاندا ەپيدەمياعا قارسى شارالار جوسپارى بار - پرەزيدەنت
«مەملەكەتتىك شەكاراداعى، ستانتسيالار مەن اۋەجايلارداعى وتكىزۋ پۋنكتتەرىندە سانيتارلىق- ەپيدەميولوگيالىق رەجيم كۇشەيتىلدى. مەنىڭ تاپسىرماممەن ءدارى- دارمەكتەردى، تەست جۇيەلەرىن جانە زەرتحانالىق جابدىقتاردى ساتىپ الۋعا ۇكىمەت رەزەرۆىنەن قاراجات ءبولىندى. ەلىمىزدىڭ اۋرۋحانالارىندا توسەك- ورىن سانى جەتكىلىكتى. مەملەكەتتىك ورگاندار سانيتارلىق- پروفيلاكتيكالىق جانە ەپيدەمياعا قارسى شارالاردى ۇيىمداستىرۋدىڭ جوسپارلارىن ازىرلەپ قويدى»، - دەدى مەملەكەت باسشىسى تەلەارنالار ارقىلى كورسەتىلگەن ۇندەۋىندە.
پرەزيدەنت قازاقستان ازاماتتارىن ۋاكىلەتتى قىزمەتتەرگە كومەكتەسۋگە شاقىردى.
«مۇنداي جاعدايدا ءبارىمىز جاۋاپكەرشىلىك پەن ءتارتىپ كورسەتۋىمىز قاجەت. اۋرۋ بەلگلەرى بايقالسا، دەرەۋ تۇرعىلىقتى جەرىڭىزدەگى مەديتسينالىق قىزمەتكە جۇگىنىڭىز. مەديتسينالىق تەكسەرۋدەن جالتارىپ، كارانتين رەجيمىن بۇزعاندار جازالانادى. وزىڭىزگە جانە جاقىن ادامدارىڭىزعا قامقورلىقتىڭ قاراپايىم جولدارىن ەستە ۇستاڭىز: قولىڭىزدى ۇنەمى جۋىپ، سانيتارلىق گيگيەنانى ساقتاڭىز، حالىق كوپ جينالاتىن ورىندارعا بارماڭىز»، - دەدى ق. توقايەۆ.
سونىمەن بىرگە، پرەزيدەنت بۇل كۇندەرى مەديتسينا قىزمەتكەرلەرىنە اۋىرتپالىق تۇسەتىنىن ەسكە سالدى.
«كوپ نارسە ولاردىڭ كاسىبيلىگىنە بايلانىستى بولماق. ەل ومىرىندەگى كۇردەلى كەزەڭنەن ءبىزدىڭ دارىگەرلەر ابىرويمەن ءوتىپ، قازاقستاندىقتاردىڭ دەنساۋلىعىن ساقتاۋ ءۇشىن بار جاعدايدى جاساۋى كەرەك»، - دەدى مەملەكەت باسشىسى.
ايتا كەتەيىك، ق ر پرەزيدەنتى قاسىم- جومارت توقايەۆ ەل حالقىنا ۇندەۋ جولدادى. جولداۋدىڭ تولىق ءماتىنى ارنايى جاريالاندى.
اۆتور: ايجان سەرىكجان قىزى
