اقتوبەدە شەتەلدەن كەلگەن ادامدار قاتاڭ باقىلاۋعا الىندى
ازىق-تۇلىك باعاسىن باقىلاۋ، جانار- جاعارماي باعاسىن قاداعالاۋ جانە شەتەلدەن كەلگەن ازاماتتاردى تەكسەرۋ جۇمىستارى كۇشەيتىلدى، دەپ حابارلايدى قازاقپارات ءتىلشىسى وبلىس اكىمىنىڭ باسپا ءسوز قىزمەتىنە سىلتەمە جاساپ. اقتوبە وبلىسىنىڭ اكىمى وڭداسىن ورازالين پرەزيدەنت قاسىم- جومارت توقايەۆتىڭ قازاقستان رەسپۋبليكاسى حالقىنىڭ قاۋىپسىزدىگىن قامتاماسىز ەتۋ ماقساتىندا جاريالاعان توتەنشە جاعدايىنا بايلانىستى شۇعىل جيىن وتكىزدى.
وبلىس اكىمىنىڭ ورىنباسارلارى، قالا، اۋدان اكىمدەرى مەن دەپارتامەنت، باسقارما باسشىلارى، ساۋدا ورىندارىنىڭ وكىلدەرى قاتىسقان باسقوسۋدا اقتوبە وبلىسىندا توتەنشە جاعداي رەجيمىن قامتاماسىز ەتۋ، الدىن الۋ شارالارىن كۇشەيتۋ ماسەلەسى تالقىلاندى.
«دۇنيەجۇزىنە تاراعان ىندەتكە قاتىستى ءوز تاراپىمىزدان جان- جاقتى شارالاردى قامتاماسىز ەتەتىن بولامىز. سالعىرتتىق تانىتپاۋ قاجەت، ءارقايسىسىمىزعا ارتىلعان ءتيىستى مىندەتتەردى دۇرىس اتقارىپ، ۇلكەن جاۋاپكەرشىلىكپەن قاراۋعا مىندەتتىمىز»، - دەدى وڭداسىن ورازالين. ءوڭىر باسشىسى تۇرعىنداردى ۇرەيلەنبەۋگە شاقىردى.
اقتوبەدەگى «دينا»، «انۆار» سىندى ازىق-تۇلىك دۇكەندەرى، حالىققا قىزمەت كورسەتۋ ورتالىقتارى توقتاۋسىز جۇمىسىن جالعاستىرادى. ايماق باسشىسى ساۋدا ورىندارىنىڭ باسشىلارىنا ازىق-تۇلىك باعاسىن وسىرمەۋدى جانە قىزمەتكەرلەرىنىڭ ساقتىق شارالارىن ورىنداۋىن سونداي-اق، قوعامدىق كولىك تاسىمالداۋ مەكەمەلەرىنىڭ باسشىلارىنا اۆتوبۋستاردا دەزينفەكسيا جۇمىستارىن جۇرگىزۋدى تاپسىردى.
دەنساۋلىق ساقتاۋ باسقارماسىنىڭ باسشىسى اسەت قاليەۆكە بارلىق قوعامدىق ورىندارعا COVID-19 كوروناۆيرۋسىنىڭ بەلگىلەرى جايىندا حابارلاندىرۋلار تاراتىپ، اقتوبەدە شىعارىلاتىن بەتپەردە سانىن ارتتىرۋ قاجەتتىگىن ايتتى. وبلىس اكىمى جيىنعا سەلەكتورلىق رەجيمدە قاتىسقان اۋدان باسشىلارىنا اۋدانداردا قۇرىلعان شۇعىل شتاب جۇمىسىن جانداندىرۋ كەرەكتىگىن اتاپ ءوتتى.
«اقتوبەدە جاعداي تۇراقتى، دەگەنمەن دە «ساقتىقتا قورلىق جوق» دەگەن ءسوز بار. بىرىنشىدەن جاۋاپكەرشىلىك، ۇيىمشىلدىق، اۋىزبىرشىلىك تانىتۋ ارقىلى اقتوبەلىكتەردىڭ بۇل سىناقتان دا سۇرىنبەي شىعارىنا سەنەمىن»، - دەدى ايماق باسشىسى.
ايتا كەتەيىك، اقتوبەدە يتاليا، فرانسيا، وڭتۇستىك كورەيا جانە ا ق ش-تان كەلگەن ازاماتتار كارانتيندە جاتىر. ولاردان ارنايى سىناما الىنىپ، تەكسەرۋگە جىبەرىلدى.
