داۋرەن ابايەۆ بەيبىت جيىندارعا قاتىستى الەمدىك تاجىريبەمەن ءبولىستى
«ءبىز حالىقارالىق، ونىڭ ىشىندە ە ق ى ۇ ەلدەرىنىڭ تاجىريبەلەرىن تىڭعىلىقتى زەردەلەپ شىقتىق. تولىقتاي العاندا، حالىقارالىق تاجىريبە الەمنىڭ كوپتەگەن ەلدەرىندە بەيبىت جيىنداردى ۇيىمداستىرۋ جانە وتكىزۋ بارىسىنداعى باستى باسىمدىق قوعامدىق قاۋىپسىزدىك ەكەندىگىن كورسەتتى. قوعامدىق-ساياسي احۋالدىڭ ناشارلاپ كەتۋىنە بايلانىستى بەيبىت جيىنالىستار وتكىزۋ جونىندەگى زاڭنامالارىن قاتاڭداتۋعا بارعان ءبىرقاتار دەموكراتيالىق ەل بار»، - دەدى مينيستر قازاقستان رەسپۋبليكاسىندا بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە بەيبىت جينالىستاردى ۇيىمداستىرۋ جانە وتكىزۋ ءتارتىبى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوبالارىن تانىستىرۋ بارىسىندا.
ونىڭ اتاپ وتۋىنشە، زاڭدارىن ىرىقتاندىرۋعا بارعان فرانسيا، گەرمانيا، ۇلى بريتانيا، پولشا، پوستكەڭەستىك كەڭىستىكتە قىرعىزستان مەن ارمەنيا سىندى ەلدەر دە بار. ولاردا بەيبىت جيىنداردى وتكىزۋ ەسكەرتۋ جۇيەسى ارقىلى ورىن الادى.
«رۇقسات بەرۋ جۇيەسى ا ق ش، شۆەتسيا، جاپونيا، سينگاپۋردا قولدانىلادى. بەيبىت جينالىستاردى ۇيىمداستىرۋ مەن وتكىزۋ ماسەلەلەرىن رەتتەيتىن قولدانىستاعى زاڭناماسى 25 جىل بۇرىن، 1995-جىلى قابىلدانعان. قوعام ساناسىنا جينالىستار مادەنيەتىن سىڭىرەتىن ۋاقىت كەلەدى. ءسوز قولدانىستاعى زاڭنامانى تەك وزگەرتۋ جايىندا عانا ەمەس، تۇجىرىمدامالىق تۇرعىدا جاڭا زاڭ جوباسى جايىندا بولىپ وتىر. ول بەيبىت جيىنداردىڭ بارلىق تۇرلەرىن ۇيىمداستىرۋ جانە وتكىزۋ ماسەلەلەرىن رەگلامەنتتەيتىن بولادى»، - دەدى داۋرەن ابايەۆ.
