كوروناۆيرۋستان ساقتانۋ ماقساتىندا ەلىمىزدە ناۋرىز مەرەكەسىن تويلاۋ شەكتەلەدى
بۇل تۋرالى بۇگىن وتكەن باسپا ءسوز ءماسليحاتىندا ايتىلدى. جالپى جيىندا جاۋاپتى مەكەمە وكىلدەرى قاۋىپتى ىندەتتىڭ الدىن الۋ جۇمىستارىنىڭ قالاي جۇزەگە اسىپ جاتقانى جونىندە باياندادى.
ماسەلەن، مەديتسينا عىلىمدارىنىڭ دوكتورى، استانا مەديتسينا ۋنيۆەرسيتەتىنىڭ كافەدرا مەڭگەرۋشىسى ديناگۇل باەشيەۆانىڭ ايتۋىنشا، جىلدا بۇل ۋاقىتتا ەلورداداعى بالالار اۋرۋحاناسىندا 330-دان استام بالا جاتاتىن. پروفيلاكتيكالىق شارالاردىڭ ارقاسىندا بۇل سان بيىل ەكى ەسەگە ازايىپتى. ياعني كوروناۆيرۋستان ساقتانعان اتا- انالار ۇل- قىزدارىن قوعامدىق ورىندارعا كوپ جىبەرمەيتىن بولعان. بۇدان بولەك مامان الەمدى دۇرلىكتىرگەن ۆيرۋستان قورعانۋدىڭ جولدارىن دا ايتتى.
ديناگۇل باەشيەۆا، استانا مەديتسينا ۋنيۆەرسيتەتىنىڭ كافەدرا مەڭگەرۋشىسى:
- ەگەر ءبىز باس مەملەكەتتىك سانيتارلىق دارىگەردىڭ ايتقانىن ورىنداساق ەلىمىزدە كوروناۆيرۋستىڭ تاراۋىن شەكتەيمىز. ىندەتتەن ساقتانۋدىڭ بەس ءتاسىلىن ەستەن شىعارمايىق. ءبىرىنشىسى كوروناۆيرۋس تىركەلگەن مەملەكەتتەرگە بارماۋ. ەكىنشىسى قالاڭىزداعى ادام كوپ جينالاتىن ورىندارعا بارماۋ. قولدى ۇنەمى جۋىپ، تازا ۇستاۋ كەرەك. باستىسى، تۇشكىرۋ مەن جوتەلۋ مادەنيەتىن ساقتاۋدى ۇمىتپاعان ءجون. بۇل ەرەجەلەر ۆيرۋس جۇقتىرماۋعا كومەكتەسەدى.
www.24.kz
