بەردىبەك ساپاربايەۆ ءدىني جورالعىلاردا ىسىراپشىلىق جاساماۋعا شاقىردى
ايماق باسشىسى اتاپ وتكەندەي، قازىرگى تاڭدا وبلىستا 350 دەن استام ءدىني بىرلەستىك جۇمىس ىستەيدى، ولاردىڭ باسىم كوپشىلىگى مەشىتتەر. كەز كەلگەن ءىلىم بەيبىتشىلىك پەن جاقسىلىق يدەيالارىن ۋاعىزدايدى دەسەك، وسى ورايدا جەرگىلىكتى ءدىن قايراتكەرلەرى دە قازاقستان حالقىنىڭ بىرلىگىن نىعايتۋعا ءوز ۇلەستەرىن قوسۋى ءتيىس.
سەنىم يەلەرىنىڭ، اسىرەسە جاستار اراسىندا سابىرلىق پەن تولەرانتتىلىق نەگىزدەرىن وقىتۋعا دەن قويۋ كەرەك.
قازاقستان - زايىرلى مەملەكەت. بۇل تۇرعىدان كەلگەندە ءدىني نىسانداردى جەكە قاراجات ەسەبىنەن سالۋعا ەشكىم قارسى ەمەستىگى، الايدا باستى مىندەت رەتىندە - بالالارعا ساپالى ءبىلىم بەرۋ ماڭىزدىلىعى ايتىلدى. سونداي-اق، مەملەكەتتىك ءتىلدى مىندەتتى تۇردە وقىتۋ، ونى قىزمەت بارىسىندا پايدالانۋ جايى دا نازارعا الىندى. يمامداردىڭ ءار ءسوزى كەلۋشىلەر ءۇشىن ۇلكەن ءرول اتقارادى دەسەك، ولاردىڭ دايىندىق دەڭگەيى مەن وزەكتى ماسەلەلەرى، شەت ەلدەردەن جەتكىزىلەتىن ءدىني ادەبيەتتەردىڭ مازمۇنىنا اسا ءمان بەرۋ ماسەلەسىنە كوڭىل ءبولىندى.
وبلىستىق ءدىن ىستەرى باسقارماسىنىڭ باسشىسى جانگەلدى وماروۆ ق م د ب- مەن بىرلەسىپ ەلىمىزدە تىيىم سالىنعان ءدىني ۇيىمدار مەن اعىمداردىڭ جولىن كەسۋ بويىنشا الدىن الۋ جۇمىستارى جۇرگىزىلىپ جاتقانىن اتاپ ءوتتى.
بۇگىندە قوعامدا ءدىننىڭ ىقپالى كۇن ساناپ ارتۋدا دەسەك، وعان دالەل رەتىندە جۇما نامازعا كەلەتىندەردىڭ سانىنىڭ وبلىس بويىنشا 35 مىڭنان 37 مىڭعا كوبەيگەنىن جانە ولاردىڭ باسىم بولىگى جاستار ەكەنىن ايتۋعا بولادى.
باسقوسۋ بارىسىندا وبلىس اكىمى باسقارما باسشىسىنىڭ بايانداماسىن ورتاسىنان توقتاتىپ، جيىننىڭ كۇن تارتىبىندەگى نەگىزگى ماسەلەسى مەن ماقساتىن ەسكە سالدى. قالىپتاسىپ وتىرعان جاعدايدى جاقسارتۋ ءۇشىن ۆەدومستۆو قانداي قادامدار جاساي الاتىندىعىن سۇرادى.
مەكتەپتەردە ونلاين- دارىستەر وتكىزىلىپ، تەولوگتار مەن جۋرناليستەردەن ارنايى توپتار قۇرىلدى. قورداي اۋدانىندا يمامدار ءۇشىن قازاق ءتىلىن ۇيرەتۋ كۋرستارى اشىلعان. الداعى ۋاقىتتا وندا باسقارۋ ءبولىمىن قۇرۋ جوسپارلانىپ وتىر.
وبلىس باسشىسى ءوڭىر بويىنشا 70 تەولوگتىڭ ەڭبەك ەتەتىنىنە كۇمان كەلتىرىپ، ءبىر ايماق قانا ەمەس، ءتىپتى ەل كولەمىندە مۇنداي مامانداردىڭ سانىنىڭ بولۋى ەكىتالاي ەكەندىگىن العا تارتتى.
سونداي-اق، باسقارما اۋىلداعى مەشىت يمامدارىنىڭ نە تۋرالى ۋاعىز ايتاتىندىعىن قاداعالامايتىندىعىن، ءدىن كوشباسشىلارىنىڭ كوزقاراستارى بويىنشا زەردەلەۋ شارالارىن ۇيىمداستىرمايتىندىعىنا كوڭىل ءبولدى. مەملەكەتتىك اقپاراتتىق ساياسات اياسىندا جۇمىستاردىڭ السىزدىگىن تىلگە تيەك ەتتى.
جامبىل وبلىسىنىڭ باس يمامى قانات جۇماعۇلوۆ ءدىن قىزمەتكەرلەرىنىڭ الدىنا جاڭا مىندەتتەر قويىلىپ وتىرعانىن ايتىپ، ول بويىنشا ەل مۇسىلماندارى ءدىني باسقارماسىنىڭ سايتىندا تانىسۋعا بولاتىندىعىن جەتكىزدى. قازاقستان مۇسىلماندارى ءدىني تۇعىرناماسىنىڭ «جەتى رۋحاني قازىق» قاعيداتتارىن كەلۋشىلەر اراسىندا ناسيحاتتاپ، ولاردى ءوزارا قارىم- قاتىناستا قولدانۋ قاجەتتىگىنە توقتالدى.
بەردىبەك ساپاربايەۆ ءدىني جورالعىلاردى وتكىزۋ كەزىندە ىسىراپشىلدىقتان باس تارتىپ، قاراپايىمدىلىق پەن قايىرىمدىلىق شارالارىنا كوڭىل بولۋگە شاقىردى. سونداي- اق، يمامدار مەشىتتەردە ايتىلعان ءاربىر ءسوز ءۇشىن جاۋاپكەرشىلىكتى سەزىنىپ، قوعامداعى بەيبىتشىلىك پەن تىنىشتىقتى ساقتاۋعا ۇلەستەرىن قوسۋ قاجەتتىگىن باسا ايتتى.
