الەۋمەتتىك تولەمدەر قاجەت بولعان جاعدايدا ينفلياتسيا دەڭگەيىمەن سايكەستەندىرىلەدى - مينيستر

بۇل تۋرالى بۇگىن ۇكىمەت وتىرىسىندا ق ر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ايتتى، دەپ حابارلايدى قازاقپارات ءتىلشىسى.

«بۇگىنگى جاعدايدا ۇكىمەت تاراپىنان حالىقتىڭ الدىنداعى بارلىق الەۋمەتتىك مىندەتتەمەلەر تولىق كولەمدە ورىندالادى. مەملەكەتتىك بيۋدجەتتە 2020 -جىلى 4 ميلليوننان استام الەۋمەتتىك تولەم الۋشىلارعا 3 تريلليون 377 ميلليارد تەڭگە قاراستىرىلعان. زەينەتاقى مەن جاردەماقى الۋشىلاردىڭ ساتىپ الۋ قابىلەتىن ساقتاۋ ماقساتىندا جىل باسىنان ينفلياتسيا دەڭگەيىن ەسكەرە وتىرىپ، بارلىق الەۋمەتتىك تولەمدەر 5 پايىزعا ارتتىرىلدى. ونىڭ ىشىندە زەينەتاقى 7 پايىزعا، ياعني ينفلياتسيادان 2 پايىزعا ىلگەرىلەپ ارتتىرىلدى»، - دەدى ەڭبەك ءمينيسترى.

ونىڭ اتاپ وتۋىنشە، سىرتقى نارىقتاردا قالىپتاسقان جاعدايدى ەسكەرە وتىرىپ جانە حالىق ءۇشىن بولۋى مۇمكىن سالداردى جەڭىلدەتۋ ماقساتىندا بارلىق الەۋمەتتىك تولەمدەردىڭ مولشەرى قاجەتتى جاعدايدا ينفلياتسيا دەڭگەيىمەن سايكەستەندىرىلەتىن بولادى.

«حالىقتى جۇمىسپەن قامتۋ بويىنشا بارلىق شارالار قولدانىلادى. ونىڭ ىشىندە مەملەكەتتىك «ەڭبەك» باعدارلاماسىنىڭ الەۋەتى تولىق پايدالانىلادى. وسى جىلى ءبىزدىڭ جوسپارىمىز بويىنشا 735 مىڭ ادام جۇمىسپەن قامتۋ كوزدەلىپ وتىر. باعدارلامادا داعدارىسقا دەن قويۋ بويىنشا قاجەتتى شارالار كوزدەلگەن. ولار: جۇمىسسىزداردى قايتا وقىتۋ، جەڭىلدەتىلگنەن نەسيەلەر جانە ميكروبيزنەستى دامىتۋ ءۇشىن گرانتتار بەرۋ، سۋبسيديالاناتىن جۇمىس ورىندارىنا ورنالاستىرۋ. وسى شارالارعا جەرگىلىكتى جانە رەسپۋبليكالىق بيۋدجەتتەن 323 ميلليارد تەڭگە كوزدەلگەن»، - دەدى ءبىرجان نۇرىمبەتوۆ.

اۆتور مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى