دەنساۋلىق ساقتاۋ مينيسترلىگى ءۇي جاعدايىندا كارانتيننىڭ ءتارتىبىن ءتۇسىندىردى
مينيسترلىكتىڭ حابارلاۋىنشا، ءۇي كارانتينى 1ب ساناتىنداعى ەلدەردەن شىققاننان كەيىن نەمەسە COVID-19 ۆيرۋسىن جۇقتىرۋى مۇمكىن اداممەن جاقىن بايلانىستا بولعان كۇننەن باستاپ 14 كۇنگە سوزىلادى.
كەلەسى تالاپتار مەن شارتتاردى ورىنداعان جاعدايدا ءۇي كارانتينىندە بولۋعا مۇمكىندىك بار:
1. وتباسىنىڭ وزگە مۇشەلەرىمەن بايلانىستا بولمايتىنداي ۇيدە جەكە بولمە بولۋى ءتيىس؛
2. پاتسيەنت جانە وتباسىنىڭ وزگە دە مۇشەلەرى كەڭەس بەرىلگەن ءتيىستى قورعانۋ قۇرالدارىمەن (جوق دەگەندە قولعاپپەن نەمەسە ماسكامەن) قامتىلىپ، الدىن الۋ شارالارىن ساقتاۋى (ماسەلەن رەسپيراتورلى گيگيەنانى، جوتەل ەتيكەتىن ساقتاپ، قول الىسپاۋى) كەرەك.
3. ۇيدە COVID-19 ينفەكتسياسىنان كەيىن تاۋەكەل اياسىندا قالۋى مۇمكىن ادامدار بولماۋى ءتيىس (65 جاستان اسقان قارتتار، 5 جاسقا دەيىنگى بالالار، اياعى اۋىر ايەلدەر، يممۋنيتەتى تومەن ادامدار، سوزىلمالى جۇرەك، وكپە، بۇيەك اۋرۋلارى بار ادامدار) .
ءۇي جاعدايىندا مۇنداي كارانتيندە ساقتاۋ مۇمكىن بولماسا دا ادام اۋرۋحانادا بولۋى كەرەك.
دەنساۋلىق ساقتاۋ مينيسترلىگى سونىمەن قاتار ءۇي كارانتينىندە بولعان ادامدار قانداي نۇسقاۋلىقتاردى ساقتاۋ كەرەكتىگىن ءتىزىپ بەردى:
1. ۇيدەن شىقپاۋى كەرەك.
2. جەكە، جەلدەتىلەتىن جانە ەسىگى جابىق بولمەدە بولۋى ءتيىس. بولمەدەن تەك قاجەتتى پروتسەدۋرالاردى ورىنداۋ كەزىندە قىسقا ۋاقىتقا شىعۋعا بولادى. بۇل جاعدايدا اۋىز بەن مۇرىندى مەديتسينالىق ماسكا جاۋىپ تۇرۋى ءتيىس.
3. اۋىز بەن مۇرىندى جاۋىپ تۇرىپ، تۇشكىرىپ، جوتەلۋ كەرەك. مەيلىنشە ءبىر رەتتىك شىتپەن شىنتاقپەن جاۋىپ، جوتەلگەن ابزال. وسىدان كەيىن بىردەن قول جۋىپ، سپيرتتىك نەگىزدە انتيسەپتيكالىق زاتپەن قولدى ءسۇرتۋ كەرەك.
4. تاماقتانار الدىندا جانە تاماقتانعاننان كەيىن، دارەتحانادان شىققاندا قولدى سابىندى سۋمەن جۋىپ، انتيسەپتيكپەن زالالسىزداندىرىپ وتىرۋ كەرەك. ەگەر قولىڭىزدا كىر بولسا، انتيسەپتيكالىق زاتپەن سۇرتكەنگە دەيىن سابىنمەن جۋعان ءجون. قولدى ءسۇرتۋ ءۇشىن ءبىر رەتتىك مايلىقتاردى پايدالانعان ابزال.
5. مۇمكىندىگىنشە جەكە دارەتحانا پايدالانعان دۇرىس.
6. ەگەر تەمپەراتۋراڭىز كوتەرىلىپ، تىنىس جولدارىندا اۋىرلىق بايقالسا CVI بايلانىس ورتالىعىنا حابارلاسىپ، جەدەل جاردەم شاقىرىڭىز. كارانتين تۋرالى حابارلاپ، شاعىمدانۋ سەبەبىن كورسەتىڭىز.
ءۇي كارانتينىندەگى ادامى بار وتباسىعا كەڭەس:
1. كارانتين بولمەسىنە كىرە الاتىن وتباسى مۇشەلەرىنىڭ سانىن ازايتىپ، سوزىلمالى اۋرۋلارمەن اۋىرمايتىن ءبىر ساۋ ادامعا ارتىقشىلىق بەرۋ كەرەك.
2. ۇيگە مەيماندار كەلمەۋى ءتيىس.
3. ءۇيدىڭ بارلىق مۇشەسى قولدارىن ءجيى جۋىپ تۇرۋى كەرەك.
4. اس ءۇي مەن دارەتحانا سياقتى جالپى بولمەلەردىڭ جاقسى جەلدەتىلگەنىنە كوز جەتكىزىڭىز.
5. كارانتين بولمەسىنە كىرگەن كەزدە، اۋزىڭىز بەن مۇرنىڭىزدى جاۋىپ تۇراتىن تىعىز مەديتسينالىق ماسكا كيۋىڭىز كەرەك. ەگەر ماسكا لاس نەمەسە دىمقىل بولىپ كەتسە، ونى تەز ارادا جاڭا تازا قۇرعاق ماسكامەن اۋىستىرعان ابزال. ماسكانى ءتيىستى تەحنيكانى قولدانىپ شەشىڭىز، ياعني الدىڭعى بولىكتى ۇستاماڭىز. ماسكانى قولدانعاننان كەيىن دەرەۋ شەشىپ، قولىڭىزدى جۋىڭىز.
6. كارانتيندەگى اداممەن كەز كەلگەن بايلانىستا ءبىر رەتتىك قولقاپتى پايدالانىڭىز.
7. كارانتيندەگى ادامنىڭ بولمەسىن كۇن سايىن تازالاپ، زالالسىزداندىرىڭىز.
8. كارانتيندەگى ادامنىڭ بارلىق كىر كيىمى مەن زاتىن جۋىلماي تۇرىپ، ونىڭ بولمەسىندە ساقتالعان سومكەدە ساقتاۋ كەرەك.
9. كارانتيندەگى اداممەن ۆيرۋس جۇقتىراتىن زاتتارمەن بولىسۋدەن اۋلاق بولىڭىز. مىسالى، ءتىس شەتكاسى، تەمەكى، ىدىس- اياق، سۇلگى، توسەك- ورىن جانە ت. ب. ىدىس- اياقتاردى سابىندى سۋمەن نەمەسە ىدىس جۋعىش زاتپەن جۋۋعا بولادى.
