پولكوۆنيك لەيلا الىپبايەۆا: بالالار ءۇشىن جۇرەگىم اۋىرادى

پولكوۆنيك الماتى پوليتسياسى ساپىندا 1995 -جىلدان بەرى قىزمەت ەتىپ كەلەدى.

باسىندا الاتاۋ اۋدانىنداعى كامەلەتتىك جاسقا تولماعان جاسوسپىرىمدەردىڭ ءىسى بويىنشا ينسپەكتور بولىپ قىزمەت ەتكەن.

ودان كەيىن قالالىق پ د ەرەكشە تاپسىرمالار ءبولىمىنىڭ ينسپەكتورى بولعان. قازىر قالالىق پ د يۋۆەنالدى پوليتسيا ءبولىمىنىڭ باسشىسى.

«مەنىڭ پەداگوگيكالىق ءبىلىمىم بار. بىزگە پەداگوگيكالىق ۋنيۆەرسيتەتتە وقىپ جۇرگەندە پوليتسيا قىزمەتكەرلەرى كەلىپ ءدارىس وقيتىن. ولار قۇقىق بۇزۋشىلىقتار تۋرالى ايتاتىن. مەن ولاردان ورگانداعى قىزمەت تۋرالى سۇرايتىنمىن. سولارعا قىزىعىپ ءجۇرىپ پوليتسياعا اۋىستىم. ەكىنشى رەت ءى ءى م اكادەمياسىندا ءبىلىمىمدى جالعاستىردىم. وعان تيتتەي دە وكىنبەيمىن. مەن بالالارمەن جۇمىس ىستەگەندى بۇرىننان جاقسى كورەتىنمىن»، - دەدى ول.

لەيلا الىپبايەۆا وتباسىندا 4 بالانىڭ تۇڭعىشى. لەيلا مەن ءىنىسى قۇقىق سالاسىندا قىزمەت ەتسە، تاعى ەكى ءىنىسى اكەسىنىڭ جولىن قۋىپ، قۇرىلىسشى ينجەنەر ماماندىعىن يگەرگەن.

«بىزدە جۇمىس كەستەسى وتە تىعىز. كەيدە تۇنىمەن جۇمىس ىستەۋگە تۋرا كەلەدى. كوپ ادامدى كەزدەستىرەمىز. الماتىدا كامەلەتتىك جاسقا تولماعان بالالار ءجيى ۇرلىق جاسايدى نەمەسە جوعالىپ كەتەدى. بارىنەن دە بالانىڭ جاعدايى جۇرەككە باتادى. وندايلار ءجيى كەزدەسەدى. بىزگە ول - كۇيزەلىس»، - دەدى ول.

ونىڭ ايتۋىنشا، 20 جىل ىشىندە بالالارعا قاتىستى ءتۇرلى وقيعالارمەن جۇمىس ىستەگەن.

«ءبىز تەك بالالارمەن ەمەس، اتا- انالارمەن دە جۇمىس ىستەيمىز. ىشكىلىككە سالىنعان، بالاسىنا قارامايتىن اتا- انالار وتە كوپ»، - دەدى لەيلا الىپبايەۆا.

كۇيزەلىسكە تۇسكەن ۋاقىتتاردا پولكوۆنيك وتباسىمەن سەرۋەندەپ، فيلم كورۋدى ۇناتادى.

«مەن ءوز جۇمىسىمدى جاقسى كورەمىن. پوليتسيا ايەلدىڭ جۇمىسى ەمەس دەگەنگە كەلىسپەيمىن. قوعامدىق ءتارتىپتى ساقتاۋ - ءبىزدىڭ دە مىندەتىمىز. بىزدە جەكە قۇرامنىڭ 70 پايىزى - ايەلدەر. بالالارعا انانىڭ مەيىرىمى كەرەك. جۇمىس وڭاي ەمەس، ءبىراق ونى ءبارىبىر بىرەۋ ىستەۋى كەرەك»، - دەدى ول.

اڭگىمە سوڭىندا لەيلا الىپبايەۆا بارلىق ايەلدەردى 8 - ناۋرىز حالىقارالىق ايەلدەر كۇنىمەن قۇتتىقتادى.

اۆتور: گۇلميرا عوسمانالي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى