قازاقستاندا قولما-قول اقشاسىز تولەمدەر كولەمى ءوستى
قازاقستاندا تولەم كارتوچكالارىن قولدانۋ ارقىلى تاۋارلار مەن قىزمەتتەرگە اقى تولەۋگە ارنالعان ينفراقۇرىلىم جاقسى دامىعان. بانكتىك قىزمەتتەردى تسيفرلاندىرۋدىڭ وسۋىمەن حالىقتىڭ ونلاين تولەمدەرىنە قىزىعۋشىلىعى دا ەداۋىر وسكەن. قولما-قول اقشاسىز تولەمدەر قارقىندى وسۋدە. بيىل قاڭتار ايىندا ول 1,6 تريلليون تەڭگەنى قۇرادى. بۇل وتكەن جىلدىڭ سايكەس كەزەڭىمەن سالىستىرعاندا، 2,7 ەسە كوپ.
ايتا كەتۋ كەرەك، وسى جىلدىڭ قاڭتار ايىندا قولما-قول جاسالمايتىن تولەمدەر سوماسى 2016-جىلدىڭ 12 ايىنىڭ مولشەرىنەن اسىپ ءتۇستى.
جالپى، 2019-جىلى ەلدەگى قولما-قول اقشاسىز تولەمدەر كولەمى 2,4 ەسە ءوسىپ، 13,3 تريلليون تەڭگەنى قۇرادى. 2018-جىلى بۇل كورسەتكىش 5,5 تريلليون تەڭگە بولعان. قازاقستان رەسپۋبليكاسى ۇلتتىق بانكىنىڭ مالىمەتى بويىنشا، 2019-جىلى 96,4 مىڭ كاسىپكەر 134,5 مىڭ ساۋدا نۇكتەلەرىنە 161,7 مىڭ POS- تەرمينال ورناتقان. 2018-جىلعى كورسەتكىشتەرمەن سالىستىرعاندا كاسىپكەرلەر سانى %17، ساۋدا ورىندارىنىڭ سانى %22، POS- تەرمينالدار سانى بىردەن %27 وسكەنى بايقالادى.
اعىمداعى جىلدىڭ قاڭتار ايىندا قولما-قول جاسالمايتىن تولەمدەردىڭ ەڭ كوپ مولشەرى ينتەرنەت جانە ۇيالى تەلەفون ارقىلى جۇزەگە اسىرىلعان: ول 1,2 تريلليون تەڭگە نەمەسە جالپى كولەمنىڭ %74,3 ى. بۇل رەتتە جىل ىشىندە جاسالعان تولەمدەر 3,3 ەسەدەن استام ءوستى. ينتەرنەت جانە ۇيالى تەلەفون ارقىلى جاسالعان ءبىر وپەراتسيانىڭ ورتاشا سوماسى 15,7 مىڭ تەڭگەنى قۇرايدى.
POS- تەرمينالدار ارقىلى جۇرگىزىلگەن قولما-قول اقشاسىز تولەمدەر سوماسى 2019-جىلدىڭ سايكەس كەزەڭىمەن سالىستىرعاندا %81,2 ءوسىپ، 392.3 ميلليارد تەڭگەنى قۇرادى. بانكوماتتار ارقىلى قولما-قول اقشاسىز تولەمدەر سوماسى جىلىنا %3,8 عا تومەندەپ، 14.9 تريلليون تەڭگەنى قۇرادى.
