تۇركىستاندىق شارۋا قوزىقۇيرىق ءوسىرىپ، قىرۋار پايدا تاۋىپ وتىر
وڭىرلىك كوممۋنيكاتسيالار قىزمەتىندەگى مالىمەتتەرگە قاراعاندا، بىلتىر باقكەلدى راحينبايەۆ اتاۋلى الەۋمەتتىك كومەك ارقىلى 500 مىڭ تەڭگە الىپ، ءۇيىنىڭ قوناق بولمەسىنە 600 قاپشىق قوزىقۇيرىق ۇرىعىن ورنالاستىرعان. العاشقى كەزدە اپتاسىنا 500-600 كەلى قوزىقۇيىرىق جيناپ، ءار كەلىسىن 1200 تەڭگەدەن وتكىزىپتى. ءسويتىپ، نەبارى 3 ايدا بارلىق نەسيە قارىزدارىن جاۋىپ تاستاعان. ال قازىر اپتاسىنا 300 كەلىدەن ءونىم الىپ، كەلىسىن 500-600 تەڭگە ارالىعىندا ساۋدالاۋدا.
«مەن بۇل كاسىپپەن 3 جىلدان بەرى اينالىسىپ كەلەمىن. العاشىندا وزگەلەرگە كومەكشى رەتىندە جۇمىس ىستەپ ءجۇردىم. ءوزىم اشۋعا قارجى قولبايلاۋ بولدى. كەيىننەن ۇكىمەتتەن اتاۋلى الەۋمەتتىك كومەك بەرىلەتىنىن ەستىپ، ءوز كاسىبىمدى اشۋعا مۇمكىندىك تۋعانىن ەستىپ ەرەكشە قۋاندىم. ءسويتىپ وزبەكستاننان قوزىقۇيرىق ۇرىعىن كەرەك-جاراعىمەن ساتىپ الىپ، ءوز ۇيىمنەن شاعىن ورىن اشتىم. قازىرگى تابىسىم كوڭىلگە قونىمدى»، - دەيدى باقكەلدى راحينبايەۆ.
باقكەلدىنىڭ ەندىگى ماقساتى - قوزىقۇيرىق قاپشىقتارىنىڭ سانىن 3 مىڭعا جەتكىزۋ. ول ءۇشىن وعان ىلعالدى جەر تەلىمى مەن 3 ميلليون تەڭگەدەي قارجى قاجەت. ەكى بىردەي نەسيەسىن وسى كاسىپپەن-اق جاۋىپ تاستاعان ول الداعى ۋاقىتتا دا بانكتەردەن قارىز الۋدى جوسپارلاپ وتىر.
باعباننىڭ ايتۋىنشا، قوزىقۇيرىق ونىمىنە سارىاعاش اۋدانىندا سۇرانىس وتە كوپ ەكەن. ءتىپتى شىمكەنت قالاسىنان دا ارنايى كەلىسىمشارت ۇسىنعاندار دا بولىپتى. وسىنى ەسكەرگەن باقكەلدى الداعى ۋاقىتتا جەرگىلىكتى كاسىپكەرلىك پالاتاسىنا بيزنەس يدەيا ۇسىنىپ، ول جاقتان دا 500 مىڭ تەڭگەدەي دەمەۋقارجى الۋعا نيەتتەنىپ وتىر.
