تۇركيا مەن رەسەي يدليبتە اتىستىڭ توقتاتىلاتىنىن ءمالىم ەتتى

انادولۋ اگەنتتىگىنىڭ حابارلاۋىنشا، تۇركيا پرەزيدەنتى رەجەپ تايىپ ەردوعان ر ف پرەزيدەنتى ۆلاديمير پۋتينمەن بىرگە وسى ماسەلەگە قاتىستى وتكەن كەلىسسوز قورىتىندىسىنا ارنالعان باسپا ءسوز ءماسليحاتىندا «بۇگىن تۇندە 00:01 دەن باستاپ سيريانىڭ يدليب قالاسىندا اتىستى توقتاتۋ رەجىمى كۇشىنە ەنەدى» دەپ مالىمدەدى.

تۇركيا مەملەكەتى باسشىسىنىڭ ايتۋىنشا، يدليب دەەسكالاتسيا ايماعىنىڭ مارتەبەسىن اۋىستىرۋ قاجەتتىلىگى تۋىنداعان.

«تۇرىك اسكەريلەرىنىڭ قازا تابۋىنا جول بەرىلگەن قايعىلى وقيعالاردان سوڭ يدليب دەەسكالاتسيا ايماعىنىڭ جاڭا كۆو-مارتەبەسىن قالىپتاستىرىلۋى ءسوزسىز»، - دەدى ەردوعان.

ونىڭ ايتۋىنشا، تۇركيا مەن رەسەي قىسقا ۋاقىتتا اتىستىڭ توقتاتىلۋىن قامتاماسىز ەتەدى، ودان سوڭ تاراپتار كەلىسكەن باسقا دا قادامدار جاسالادى.

ت ا س س اگەنتتىگىنىڭ حابارلاۋىنشا، ەردوعان تۇركيا سيريا اسكەريلەرىنىڭ ارەكەتىنە قارسى جاۋاپ بەرۋگە قۇقىلى دەپ مالىمدەگەن.

«رەجىمنىڭ (سيريا پرەزيدەنتى باشار اساد) تاراپىنان جاسالعان كەز-كەلگەن شابۋىلعا تۇركيا ءوز كۇشتەرىمەن قارسى جاۋاپ بەرۋ قۇقىعىن تاڭدايدى»، - دەدى تۇرىك ەلىنىڭ باسشىسى.

ول «انكارا سيريالىق بوسقىنداردىڭ وتانىنا قايتۋى ماسەلەسىندە جاردەمدەسەدى» دەپ ۋادە بەردى.

ەسكە سالا كەتسەك، يدليب پروۆينتسياسىنىڭ سيرياداعى ءتورت دەەسكالاتسيا ايماعىنىڭ قاتارىنا ەنگەنى جونىندەگى مەموراندۋمعا 2017-جىلى مامىر ايىندا رەسەي، تۇركيا، يران قول قويعان بولاتىن. 2018-جىلى قىركۇيەكتە سوچي قالاسىندا رەسەي مەن تۇركيا پرەزيدەنتتەرى وسى پروۆينتسيادا سيريا ۇكىمەتى جانە وپپوزيتسياسى اسكەرىنىڭ جاناساتىن شەكاراسى بويىندا 15-20 شاقىرىمدا دەميليتاريزاتسيا ايماعىن قۇرۋ جونىندە كەلىستى.

27- اقپاندا سيريالىق اسكەردىڭ شابۋىلىنان سوڭ 36 تۇرىك اسكەري قىزمەتشىسىنىڭ قازا تاۋىپ، يدليبتە جاعداي شيەلەنىسىپ كەتتى. سول كۇنى انكارا سيرياداعى «كوكتەمگى قالقان» اتالعان جاڭا وپەراتسيانى باستادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى