مۇحتار اۋەزوۆ تەاترىنا جاڭا باسشى كەلدى

ق ر مادەنيەت جانە سپورت ءمينيسترى اقتوتى رايىمقۇلوۆانىڭ ارنايى بۇيرىعىمەن 5 - ناۋرىزدان باستاپ تەاترعا ونەرتانۋ عىلىمدارىنىڭ كانديداتى، قازاقستاننىڭ ەڭبەك سىڭىرگەن قايراتكەرى ەركىن تىلەۋقۇل ۇلى جۋاسبەك باسشىلىق ەتەدى.

«ساتتىلىك تىلەيمىز! تالاي جىل قىزمەت ەتىپ، وسى جەردىڭ ءوسۋ- وركەندەۋىنە اتسالىسىپ كەلە جاتىرسىز. جالپى قازاقستاننىڭ تەاتر ونەرى سالاسىندا ەڭبەگىڭىز وراسان زور. سونى مينيسترلىك وتە جاقسى باعالاپ، وزىڭىزگە دەگەن ۇلكەن جاۋاپكەرشىلىك، سەنىم ارتىپ، تەاتردىڭ دامۋىنا ۇلەس قوسادى دەگەن نيەتپەن ءسىزدى تاعايىنداۋدى ءجون دەپ سانادى. قىزمەتىڭىز قۇتتى بولسىن. بۇل لاۋازىمنان كورى، ارتىلعان جاۋاپكەرشىلىكتىڭ جۇگى اۋىر. ۇجىممەن بىرگە جەمىستى قىزمەت ەتەرىڭىزگە سەنەمىز»، - دەدى ۆيتسە- مينيستر.

ەركىن جۋاسبەك 1965 -جىلى جامبىل وبلىسى بايزاق اۋدانى سارىباراق اۋىلىندا دۇنيەگە كەلگەن. 1982 -جىلى الماتى مەملەكەتتىك تەاتر- كوركەمسۋرەت ينستيتۋتىنىڭ تەاتر فاكۋلتەتىنە «دراما جانە كينو اكتەرى» ماماندىعىنا وقۋعا ءتۇستى.

ەڭبەك جولىن ق ر ۇلتتىق عىلىم اكادەمياسىنىڭ م. اۋەزوۆ اتىنداعى ادەبيەت جانە ونەر ينستيتۋتىندا اعا لابورانت بولىپ باستادى.

1990-1993 -جىلدارى وسى ينستيتۋتتىڭ اسپيرانتۋراسىندا وقىدى. 1994 -جىلى تەاترتانۋ سالاسى بويىنشا كانديداتتىق ديسسەرتاتسيا قورعاپ، اتالمىش ينستيتۋتتا عىلىمي قىزمەتكەر بولىپ جۇمىس ىستەدى.

1996-1997 -جىلدارى قازاقتىڭ ونەر ماسەلەسى بويىنشا عىلىمي ورتالىعىنا ءبولىم مەڭگەرۋشى، 1997-1999 -جىلدارى ق ر ءبىلىم جانە مادەنيەت مينيسترلىگى مادەنيەت كوميتەتىنىڭ «تەاتر جانە كينو» ءبولىمىنىڭ باستىعى بولدى.

1999-2001 -جىلدارى رەسپۋبليكالىق نەمىس دراما تەاترىنىڭ ديرەكتورى، 2001 -جىلى م. اۋەزوۆ اتىنداعى اكادەميالىق دراما تەاترىندا اكىمشىلىك ديرەكتورى، 2004-2008 -جىلدارى ق ر تەاتر قايراتكەرلەرى وداعىنىڭ ءتوراعاسى بولدى.

2008 -جىلى جەلتوقساننان 2013 -جىلى ساۋىرگە دەيىن استانا قالاسىنداعى ق. قۋانىشبايەۆ اتىنداعى مۋزىكالىق دراما تەاترىنىڭ ديرەكتورى، 2013 -جىلدىڭ 1 - ساۋىرىنەن م. اۋەزوۆ اتىنداعى قازاقتىڭ مەملەكەتتىك اكادەميالىق دراما تەاترىنىڭ ديرەكتورى- كوركەمدىك جەتەكشىسى قىزمەتىنە تاعايىندالدى.

ەركىن جۋاسبەكتىڭ «ۇيلەنۋ»، «كۇلەمىز بە، جىلايمىز با؟»، «انتيۆيرۋس» پەسالارى رەسپۋبليكا تەاترلارىندا قويىلىپ كەلەدى.

اۆتور گۇلميرا عوسمانالي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى