تۇركىستاندا ەرەكشە «ەتنواۋىل» بوي كوتەردى
بۇگىن ءوڭىر باسشىسى ءومىرزاق شوكەيەۆ قوجا احمەت ياساۋي كەسەنەسىنىڭ جانىنان بوي كوتەرگەن «ەتنواۋىل» الاڭىن ارالادى، دەپ حابارلايدى قازاقپارات وبلىس اكىمىنىڭ باسپا ءسوز قىزمەتىنە سىلتەمە جاساپ.
بىرەگەي جوبا ناۋرىز تويىنا كەلگەن قوناقتار مەن شەتەلدىك ساياحاتشىلار ءۇشىن تاريحى تەرەڭ قازاق مادەنيەتىمەن تولىعىراق تانىسۋعا جاقسى مۇمكىندىك بەرەدى. كونە عاسىر مەكەنىندە ساز بالشىقتان ۇيلەر تۇرعىزىلىپ، اعاشتان قۇراستىرىلعان قورشاۋلار مەن كوپىر، وتكەلدەر ورناتىلعان.
مارتەبەلى مەيماندار مەن سىرتتان كەلگەن شەتەلدىكتەر مۇندا كونە عاسىر كەيپىندەگى ۇيلەردى ارالاپ، سول ءداۋىردىڭ اسحانالارىنان ءدام تاتىپ، شەبەرلەر كوشەسى مەن ەرتەگىلەر مەكەنى، ساربازدار اۋىلى جانە شىعىس بازارىنىڭ ۇلگىسىن ءوز كوزدەرىمەن تاماشالاي الادى. ناۋرىز مەرەكەسى كۇندەرى بابالار داۋىرىنە ساياحات جاساتاتىن كوشپەلى اۋىلدا كيىز ۇيلەر تىگىلىپ، ۇلتتىق ويىندار ويناتىلادى. قۇرىلىس بارىسى تاريحي نىساننىڭ ساقتالۋ تالاپتارى ەسكەرىلە وتىرىپ جۇرگىزىلىپ جاتىر. وتكەن مىڭجىلدىقتان سىر شەرتەتىن قازاق اۋىلى 14 ناۋرىزدا اشىلادى.
وبلىس اكىمى ءومىرزاق ەستاي ۇلى كەسەنەگە بارار جولدا ورنالاسقان قاشقاري گۇل باعىن كوگالداندىرۋ مەن اباتتاندىرۋ جۇمىستارىن كوردى. ساياباق سانىنىڭ ارتۋى شاھاردىڭ ەكولوگيالىق احۋالىن جانە ەستەتيكالىق بەينەسىن جاقسارتۋعا مۇمكىندىك بەرەدى. سونىمەن قاتار، ءوڭىر باسشىسى بۇرىنعى اكىمدىك عيماراتىندا ءجۇرىپ جاتقان قۇرىلىس جۇمىستارىنىڭ بارىسىمەن تانىستى. ەسىمحان الاڭىندا ورنالاسقان عيمارات ەندى زاماناۋي قوناقۇيگە اينالادى. وڭىردە تۋريزم سالاسىن دامىتۋ ماقساتىندا جارتى جىلدا قولجەتىمدى دە الەمدىك ستاندارتتارعا ساي جاڭا قوناق ءۇي كەشەنى اشىلادى.
سونىمەن قاتار، وبلىس اكىمى تەمىرجول ۆوكزالى الدىنداعى اللەيانىڭ كۇردەلى جوندەۋ جۇمىستارىنىڭ بارىسىن تەكسەردى. مۇندا اياقجول توسەۋ، جارىق كوزدەرىن جانە ورىندىقتار مەن قوقىس جاشىگىن ورناتۋ، كىشى ارحيتەكتۋرالىق پىشىندەر قويۋ جوسپارلانۋدا. سونداي- اق، سۋ ۇڭعىماسى قازىلىپ، دەكوراتيۆتى اعاش كوشەتتەرى وتىرعىزىلادى. الداعى ۋاقىتتا تەمىرجول ۆوكزالىنىڭ ىشكى جۇيەسى دە زاماناۋي تالاپقا سايكەستەندىرىلمەك. قالاعا كەلگەن تۋريستەر ءۇشىن اقپارات الۋ بەكەتى سىندى جۇيەلەردى قويۋ كوزدەلگەن. كۇردەلى جوندەۋدەن وتكەن اللەيا ناۋرىز مەرەكەسى قارساڭىندا پايدالانۋعا بەرىلەدى دەپ جوسپارلانىپ وتىر.
