قازاقستاننىڭ وڭتۇستىك كورەياداعى كونسۋلدىق ەسەبىنە تىركەلۋشىلەر سانى كۇرت ءوستى
«وڭتۇستىك كورەياداعى كونسۋلدىق ەسەپكە تۇرىپ جاتقان قازاقستاندىقتاردىڭ سانى كۇرت ءوسىپ كەلەدى. ويتكەنى 1 - ناۋرىزدان باستاپ نۇر- سۇلتان - سەۋل جانە الماتى - سەۋل باعىتتارى بويىنشا تۇراقتى رەيستەردىڭ سانى اپتاسىنا 9 دان 3 كە دەيىن ازايعان بولاتىن. سوندىقتان ول جاقتاعى وتانداستارىمىز كەلەشەكتە شىعا الماي قالمايمىز با دەپ قورقىپ، وزدەرىنىڭ سوندا جۇرگەنىن ءبىلدىرىپ جاتىر. ءبىز ول جاقتا قانشا وتانداسىمىز بارىنا، نە ىستەپ جاتقانىنا ەسەپ جۇرگىزۋ ۇستىندەمىز» ، - دەدى ايبەك سمادياروۆ قازاقپارات ءتىلشىسىنىڭ سۇراعىنا جاۋاپ بەرە وتىرىپ.
سىرتقى ىستەر مينيسترلىگىنىڭ رەسمي وكىلىنىڭ ايتۋىنشا، قازىرگى تاڭدا وڭتۇستىك كورەيا اۋماعىندا قازاقستاننىڭ 35 مىڭعا تارتا ازاماتى ءجۇر.
«وتكەن اپتادا ولاردىڭ 800 ءى كونسۋلدىق ەسەپتە تۇرسا، بۇگىنگى كۇنى ەسەپكە تىركەلگەندەردىڭ سانى 1500 گە جەتتى. 35 مىڭ قازاقستاندىقتىڭ شامامەن 12 مىڭى ول جاقتا زاڭسىز جۇرگەندەر» ، - دەدى ول.
ەسكە سالا كەتسەك ق ر يندۋستريا جانە ينفراقۇرىلىمدىق دامۋ ۆيتسە- ءمينيسترى بەرىك كاماليەۆ كەشەگى ۇكىمەت وتىرىسىندا 1 - ناۋرىزدان باستاپ نۇر- سۇلتان - سەۋل جانە الماتى - سەۋل باعىتتارى بويىنشا تۇراقتى رەيستەردىڭ سانى اپتاسىنا 9 دان 3 كە دەيىن قىسقارعانىن ءمالىم ەتكەن ەدى.
ال پرەمەر- ءمينيستردىڭ ورىنباسارى ەرالى توعجانوۆ قىتاي مەن يران باعىتىنداعى اۋە رەيستەرى توقتاتىلعانىمەن، نەلىكتەن وڭتۇستىك كورەيا باعىتىندا تەك شەكتەلگەنىن ءتۇسىندىرىپ بەردى.
