كوپبالالى وتباسىلاردىڭ نەسيەسىن جابۋ اكسياسى قايتا وتكىزىلە مە؟
بۇل جايىندا ق ر پرەزيدەنتى اكىمشىلىگى وتىنىشتەردى قاراۋدى باقىلاۋ ءبولىمىنىڭ اقپاراتىندا ايتىلعان، دەپ حابارلايدى قازاقپارات ءتىلشىسى.
«ق ر پرەزيدەنتى اكىمشىلىگى وتىنىشتەردى قاراۋدى باقىلاۋ بولىمىنە ارىزدانۋشىلاردان ومىرلىك قيىن جاعدايعا تاپ بولعان ازاماتتار ءۇشىن نەسيە بويىنشا بورىش جۇكتەمەسىن تومەندەتۋ تۋرالى سۇراقتار ءتۇسىپ جاتىر. وسىعان وراي، مەملەكەت باسشىسىنىڭ تاپسىرماسىنا سايكەس، بۇل شارا بىررەتتىك تارتىپپەن جۇرگىزىلگەندىگىن حابارلايمىز»، - دەپ اتاپ وتەدى ق ر پرەزيدەنتى اكىمشىلىگىنەن.
ايتا كەتسەك، اتالعان اكسيا ەكىنشى دەڭگەيلى بانكتەر مەن شاعىن قارجى ۇيىمدارى كەپىلدىكسىز تۇتىنۋشىلىق نەسيەلەرى بويىنشا ەسەپتەلگەن ايىپپۇلدار مەن ءوسىمپۇلداردى ەسەپتەن شىعارۋ تۋرالى شەشىم قابىلدانعان قازاقستاندىقتارعا قاتىستى بولدى.
سونىمەن قاتار ومىرلىك قيىن جاعدايدا قالعان قازاقستاندىقتار، اتاپ ايتقاندا، كوپبالالى وتباسىلار؛ اسىراۋشىسىنان ايرىلۋ جاعدايىنا بايلانىستى تولەم الاتىن وتباسىلار؛ 18 جاستان اسقان بالا جاسىنان مۇگەدەكتەر بار وتباسىلار؛ اتاۋلى مەملەكەتتىك الەۋمەتتىك كومەك الاتىندار؛ جەتىم بالالار؛ 2019-جىلعى 26- ماۋسىمداعى جاعداي بويىنشا اتا-اناسىنان كامەلەتتىك جاسقا دەيىن ايىرىلعان، 29 جاسقا تولماعان، اتا-انانىڭ قامقورلىعىنسىز قالعان بالالارعا اكسياعا قاتىسۋ مۇمكىندىگى بەرىلدى. ءبىر قارىز الۋشىعا نەگىزگى بورىشى مەن وعان ەسەپتەلگەن سىياقىدان تۇراتىن وتەلەتىن بەرەشەگىنىڭ مولشەرى 300000 تەڭگەدەن اسپايتىن بولسا، ولاردى وتەۋ جولىمەن كومەكتەسۋگە شەشىم قابىلداندى. بۇل رەتتە كەپىلسىز تۇتىنۋشىلىق قارىزدارى بويىنشا قارىز الۋشىلاردىڭ جالپى بەرەشەگى 2019-جىلعى 1- ماۋسىمداعى جاعداي بويىنشا 3 ميلليون تەڭگەدەن اسپاۋى ءتيىس.
«بۇل اكسيا 2019-جىلى اياقتالدى. ونىڭ قورىتىندىسىندا جالپى سوماسى 115 ميلليارد تەڭگەنى قۇرايتىن 554 مىڭ ازاماتتىڭ كەپىلسىز تۇتىنۋشىلىق نەسيەلەرى بويىنشا بورىشتار ەسەپتەن شىعارىلدى. تاياۋ ۋاقىتتا بۇل اكسيانى قايتالاۋ جوسپارلانىپ وتىرعان جوق»، - دەلىنگەن تاراتىلعان اقپاراتتا.
