وڭتۇستىك كورەيادان ەلگە ورالۋعا نيەت بىلدىرگەن قازاقستاندىقتاردىڭ سانى ارتىپ كەلەدى

الايدا، ەكى ەل اراسىنداعى اۋە رەيستەرىنىڭ سانى قىسقارعاندىقتان، وسى ايداعى سەۋل - نۇر- سۇلتان جانە سەۋل - الماتى باعدارلارىنا بارلىق بيلەتتەر ساتىلىپ كەتكەن. قاراعاندىلىق ماكسيم ۆاگنەر ەلگە ورالاتىن كۇندى اسىعا كۇتىپ ءجۇر. ول كورەيادا اۆتولىكتەرگە قوسالقى بولشەكتەر جەتكىزەتىن كومپانيا اشقان. جۇمىس بابىمەن جىلىنا بىرنەشە رەت قازاقستانعا قاتىناپ تۇرادى. كوروناۆيرۋس ونىڭ كاسىبىنە ايتارلىقتاي شىعىن كەلتىرىپ وتىر. سەبەبى، رەيستەرى بىرنەشە رەت كەيىنگە شەگىرىلىپ، ءىسى توقتاپ تۇر.

ماكسيم ۆاگنەر، كاسىپكەر:

- رەيستەردى قىسقارتۋدىڭ قاجەتى بولعان جوق. ويتكەنى ەلگە ورالامىن دەگەن ادامدار ايتەۋىر ءبىر امالىن تابادى. ال وسىندا قالسا، اۋرۋدى جۇقتىرىپ الۋى مۇمكىن. كارانتينگە ورنالاستىرسا، قارسى بولمايمىن. ءوز ۇيىمدە تۇرسام، جاقىندار مەن بالالارىما اۋرۋ جۇقتىرۋىم مۇمكىن.

ۆيرۋستان تۋريزم سالاسى دا شىعىنعا باتىپ وتىر. قازاقستانعا بارۋدى جوسپارلاعان 500-دەن اسا ادام جولىنان قالدى.

لي كان حي، تۋريستىك كومپانيانىڭ ديرەكتورى:

- قازاقستان ۇكىمەتى كارانتين تۋرالى الدىن الا جاريالاپ، ناقتى ەرەجەلەرىن بەلگىلەگەندە بىزگە جەڭىل بولار ەدى. قازىر تۋريستىك ماۋسىمنىڭ قىزىپ تۇرعان كەزى. قاڭتاردان ناۋرىز ايىنا دەيىن ەلدەرىڭىزدە قالىڭ قار جاۋادى، سول سەبەپتەن وڭتۇستىك كورەيا تۇرعىندارى شىمبۇلاققا شاڭعى تەبۋگە بارعاندى ۇناتادى.

قازاقستان ەلشىلىگى كورەيادا تۇرىپ جاتقان وتانداستارىمىزدى كونسۋلدىق تىركەۋگە تۇرۋعا شاقىرعان. وسى ۋاقىتقا دەيىن ءبىر جارىم مىڭداي ادام تىركەلگەن. الايدا، سىرتقى ىستەر مينيسترىلىگىنىڭ مالىمەتىنشە، وڭتۇستىك كورەيادا ءالى 35 مىڭداي ازاماتىمىز بار. ناۋرىز ايىنداعى رەيستەرگە ەكى مىڭنان اسا ادام بيلەت ساتىپ العان. الايدا، ۇشاقتاردا بارىنە ورىن جەتپەيتىندىكتەن، كەيبىرەۋى وزگە ەلدەر ارقىلى وتانىنا ورالاتىن ءتۇرى بار.

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى