توبىل قالاسىندا قاۋىپتى مەديتسينالىق قالدىق سالىنعان جاشىك تابىلدى
قاۋىپتى مەديتسينالىق قالدىقتار تۋرالى حابارلاما الەۋمەتتىك جەلىلەردە جاريالاندى. وسىعان بايلانىستى پوليتسەيلەر اۋماقتى قورشاپ، سانيتارلىق- ەپيدەميالىق ورتالىقتىڭ ماماندارىن شاقىردى.
«5 -اقپان كۇنى ساعات 18:00 شاماسىندا تەرەشكوۆا كوشەسىنىڭ بويىنداعى اۆتوتۇراقتان مەديتسينالىق قالدىق سالىنعان جاشىك تابىلدى. پوليتسياعا جەرگىلىكتى ءورت ءسوندىرۋ ءبولىمىنىڭ قىزمەتكەرى حابار بەردى. سانيتارلار جاشىك ىشىندە 20 شاقتى ەكپە قۇرالى مەن پايدالانىلعان قولعاپتار بارىن انىقتادى. مەديتسينالىق قۇرالدار س ە س زەرتتەۋىنە جىبەرىلدى. ولار ادام دەنساۋلىعىنا قاۋىپتى ەمەس»، - دەدى وبلىستىق پوليتسيا دەپارتامەنتىنىڭ باسپا ءسوز حاتشىسى يرينا بەجەنار اگەنتتىك تىلشىسىنە.
قازىر پوليتسەيلەر كۇماندى جاشىكتى تاستاعانداردى ىزدەستىرىپ جاتىر.
