قاراعاندىدا «دانا اباي، دارا اباي» كورمەسى اشىلدى

كورمەگە مۇراجاي قورىنان 30 دان استام گرافيكالىق جانە كوركەم جۇمىستار قويىلعان.

«مۇندا اباي پورترەتتەرى مەن ونىڭ شىعارماشىلىعىنا ارنالعان جۇمىستاردى كورۋگە بولادى. كورمەنىڭ باستى جادىگەرلەرى - تولەۋعالي كەڭەسبايەۆ سالعان اقىننىڭ پورترەتى، سونداي-اق ۆەنيامين ءشامشيننىڭ «اباي ءسوزى» اتتى جۇمىسى»، - دەيدى كورمەنىڭ كۋراتورى نازەركە جارتىن.

مۇراجاي جەتەكشىسى بيبىگۇل قۇدابايەۆانىڭ ايتۋىنشا، جىلدىڭ وسى كورمەمەن اشىلۋى كەزدەيسوق ەمەس.

«ابايدىڭ 175 جىلدىعى - وسى جىلعى ەڭ ماڭىزدى مەرەيتويلاردىڭ ءبىرى. جىل بويى وسى تاقىرىپقا ارنالعان مۇراجاي ساباقتارى وتكىزىلەدى. بالاباقشالار، مەكتەپتەر، كوللەدجدەر مەن ج و و وسى ساباقتاردى وتكىزۋگە ءوتىنىم بەرە الادى»، - دەپ اتاپ ءوتتى ول.

ساباق باعدارلاماسىن مۋزەي قىزمەتكەرى نازەركە جارتىن ازىرلەدى. وندا جاڭا وقۋ تەحنولوگيالارى پايدالانىلادى.

«بۇرىن ءدارىس وقيتىنبىز، بۇل جولى وقۋشىلار توپتارعا ءبولىنىپ، وزدەرى زەرتتەۋ جۇرگىزەدى. ءبىز ساباقتى ەكى تىلدە وتكىزەمىز. بۇگىن كورمەنىڭ اشىلۋىنا ءۇش مەكتەپ: اباي قالاسىنداعى №10-گيمنازيا، قاراعاندى قالاسىنىڭ №16-مەكتەبى جانە ماعجان جۇمابايەۆ اتىنداعى №39-ليتسەيدىڭ وقۋشىلارى شاقىرىلدى»، - دەيدى نازەركە جارتىن.

كورمەنىڭ اشىلۋى شاعىن كونسەرت فورماتىندا ءوتتى. وقۋشىلار اباي ولەڭدەرىن وقىپ، ءان ايتىپ، ۇلتتىق اسپاپتاردا وينادى.

«بيىل بۇكىل رەسپۋبليكا بويىنشا ءبىز ۇلى اقىن، كومپوزيتور، فيلوسوف، ساياساتتانۋشى، ويشىل، جاڭا قازاق جازبا ادەبيەتىنىڭ نەگىزىن قالاۋشى ابايدىڭ 175 جىلدىعىن تويلايمىز. ءبىزدىڭ مەكتەپتە كوپتەگەن ءىس-شارالار وتكىزىلەدى. وعان اتا-انالار دا بەلسەنە قاتىسادى. سونىمەن، مەنىڭ سىنىبىمنىڭ وقۋشىسى ەرسىن ساريك اناسى اسەم شاكەنوۆامەن بىرگە اباي پورترەتىمەن قابىرعا گازەتىن سالىپ، شىعارماشىلىق بايقاۋدىڭ گران- پريىنە يە بولدى. بۇگىن وسى قابىرعا گازەتىن ءبىز مۇراجايعا الىپ كەلدىك»، - دەدى اباي قالاسى №10-گيمنازياسىنىڭ باستاۋىش سىنىپ مۇعالىمى اڭساعان اقجان قىزى.

«دانا اباي، دارا اباي» كورمەسى 20-قاڭتارعا دەيىن جالعاسادى.

فوتو: forum.ekaraganda.kz

اۆتور: اگاتا مۋحامەدجانوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى