ەرلان داكەنوۆ: تەلەفوننان كوز المايتىن جاس بۋىنعا اباي تاعىلىمىن ءسىڭىرۋىمىز كەرەك
نۇر-سۇلتان قالالىق اكىمدىگىنىڭ مەملەكەتتىك اكادەميالىق فيلارمونياسىنىڭ باس ديرەكتورى ەرلان داكەنوۆ ۇلى ويشىلدىڭ مەرەيتويى الدىندا وسىنداي پىكىر ءبىلدىردى، دەپ حابارلايدى قازاقپارات ءتىلشىسى.
«كۇنى كەشە ەل پرەزيدەنتى قاسىم-جومارت توقايەۆتىڭ «اباي جانە XXI عاسىرداعى قازاقستان» اتتى ماقالاسى جارىق كوردى. بۇل ەڭبەك - ۇلى ويشىل ابايدىڭ مول مۇراسىن بۇكىل جۇرتقا پاش ەتۋدىڭ، كەمەڭگەردىڭ 175 جىلدىعىن جوعارى دەڭگەيدە اتاپ ءوتۋدىڭ كىلتى دەپ بىلەمىن. پرەزيدەنت بىزگە جول سىلتەي وتىرا، اباي شىعارمالارىنىڭ قۇندىلىقتارىن مىناۋ دامىعان زامانمەن سالىستىرادى. وركەنيەتتى ەلدەردىڭ الدىندا قازاق ءبىلىمدى، بىلىكتى، عىلىمنىڭ دامۋىنا ۇلەس قوسۋى قاجەتتىگىن ايتادى. بۇعان بارلىق ەل بولىپ جۇمىلا كىرىسۋىمىز قاجەت. اسىرەسە، كۇنى- ءتۇنى كوزىن تەلەفوننان المايتىن بولاشاق ۇرپاقتى تاربيەلەۋىمىز كەرەك. بويلارىنا ابايدان قالعان اسىل مۇرانى ءسىڭىرۋ شارت. ويتكەنى، جۇمىلا كوتەرگەن جۇكتىڭ قاشان دا جەڭىل ەكەنى حاق»، - دەيدى ەرلان داكەنوۆ.
ونىڭ ايتۋىنشا، جاستاردىڭ بويىندا پاتريوتتىق سەزىمدى، ولاردىڭ تاريحقا دەگەن قۇلشىنىسىن وياتۋ ءۇشىن فيلارمونيا ابايدىڭ مۋزىكا الەمىنە قوسقان ولشەۋسىز ۇلەسىن دارىپتەپ كەلەدى. بۇگىن دە كومپوزيتوردىڭ اۋەزدى اندەرى مەملەكەتتىك اكادەميالىق فيلارمونيانىڭ رەپەرتۋارىندا ويىپ تۇرىپ ورىن العان.
«سونداي-اق، ابايدىڭ 175 جىلدىق مەرەيتويى اياسىندا ونەر ورداسىنىڭ ۇجىمى، ياعني 700 قىزمەتكەر «كوزىمنىڭ قاراسى» شىعارماسىن ورىنداۋ بويىنشا چەللەندج ۇيىمداستىردى. بۇل اۋقىمدى ەستافەتا ەلىمىزدىڭ بارلىق ايماعىندا جالعاسىن تاپتى. ابايدىڭ مۇراسىن، تاعىلىمىن جاس ۇرپاققا جەتكىزۋ باعىتىندا ەڭبەگىمىز جالعاسادى. كەمەل ويدىڭ كەمەڭگەرى اباي قۇنانباي ۇلىنىڭ ەسىمى ەشقاشان ولمەك ەمەس. ونى بۇگىنگى ۇرپاق ۇلىقتاي بەرەدى»، - دەيدى ول.
ەسكە سالا كەتسەك، «ەگەمەن قازاقستان» گازەتىندە ق ر پرەزيدەنتى قاسىم-جومارت توقايەۆتىڭ «اباي جانە XXI عاسىرداعى قازاقستان» اتتى ماقالاسى جاريالانعان بولاتىن.
اۆتور: ايان بەكەن ۇلى
