ۇشاق تەرەزەسىنە كەپتەلىپ اجالدان امان قالعان كاپيتان
بورتتا 81 جولاۋشى مەن ەكيپاجدىڭ 6 مۇشەسى. ءبارى جاپ- جاقسى باستالعانداي ەدى. ۇشۋدىڭ 13- مينۋتىندا، اۋە كەمەسى جەردەن 5273 مەتر بيىكتىككە كوتەرىلگەندە ۇشقىشتىڭ كابيناسىنان سارت ەتكەن دىبىس شىعادى ... ۇشاق كاپيتانى تيموتي لانكاستەردى ءبىر كۇش وتىرعان ورىندىعىنان جۇلىپ الادى. سويتسە، ۇشاقتىڭ قاسبەتتەگى سول جاق اينەگى اۋا قىسىمىنا شىداماي، جۇلىنىپ كەتىپتى دە، كاپيتاندى سىرتقى اۋا وزىنە سورىپ الىپتى. قۇداي قولداعاندا، لانكاستەر بىردەن ۇشىپ كەتپەي، تەرەزەنىڭ جاقتاۋىنا كەپتەلىپ قالعان.
ونىڭ ۇستىنە وسى ساتتە بورتسەرىك نايدجەل وگدەن دە قاراپ تۇرماي، كاپيتاننىڭ اياعىنان تاس قىپ ۇستاپ ۇلگەرگەن. ەگەر كاپيتاندى ۇستاپ ۇلگەرمەسە، ول بارىپ ۇشاقتىڭ موتورىنا سۇڭگىپ كەتەر ەدى دە، ونداي جاعداي ورىن العاندا موتور ىستەن شىعىپ، اپاتقا ۇشىرايدى ەكەن.
شىنىمەن دە، قۇداي قاراسقاندا كاپيتاننىڭ تەرەزەگە كەپتەلىپ قالعانى ۇلكەن كومەك بولعان. ايتپەگەندە، تولىقتاي اشىق تەرەزەدەن كىرگەن اۋا ۇشاق پانەلىن كۇل- تالقان ەتىپ، ۇشقىشتار كابيناسى مەن جولاۋشىلار سالونىنىڭ ەكى اراسىنداعى ەسىكتى بىت- شىت ەتەر ەدى. بورتسەرىكتەر جولاۋشىلاردى تىنىشتاندىرىپ جۇرگەن كەزدە، ەكىنشى پيلوت الاستار اتچينسون اۆتوپيلوتتى ءوشىرىپ، ۇشاقتى قولمەن قوندىرۋعا ارەكەت ەتە باستايدى. بۇل كەزدە وگدەن ابدەن شارشاپ، السىرەي باستاعان.
كاپيتان لانكاستەردىڭ دە بۇكىل دەنەسى دالاعا قاراي لىقسىپ، ونىڭ بەت- ءجۇزى ۇشاقتىڭ قاپتال تەرەزەسىنىڭ سىرتىنان بوپ- بوز بوز بولىپ كورىنىپ تۇردى. ءبىر كەزدە وگدەنگە تاعى دا ەكى بورتسەرىك كومەككە كەپ، كاپيتاننىڭ اياعىنا جارماسادى. ولار اياعىنىڭ تاستاي بوپ قاتىپ قالعانىنا قاراپ، كاپيتان ءولىپ قالعان ەكەن دەپ ويلايدى.
گۋلەگەن جەل مەن ايعايدىڭ اراسىنان اتچينسون جەردەگى ديسپەتچەردىڭ قونۋعا رۇقسات بەرگەن ءۇنىن ەستىپ ۇلگەرەدى. 25 مينۋتتان كەيىن الدىڭعى تەرەزەسىندە سالاڭداعان شالاجانسار ادامى بار ۇشاق امان- ەسەن ساۋتگەمپتون اۋە- جايىنا كەپ قونادى. كاپيتان ءتىرى ەكەن، ءبىراق قاتتى ءۇسىپ قالعان جانە دەنەسى جاراقاتتانعان. ال وگدەننىڭ يىعى شىعىپ كەتكەن، بەتى ءۇسىپ قالعان. جولاۋشىلار ءدىن امان! كوپ ۇزاماي، بۇل وقيعانىڭ سەبەپكەرى دە تابىلادى.
British Airways كومپانياسىنىڭ شەبەرى الدىڭعى اينەگىن جاڭالاعان كەزدە، 90 بۇراندانىڭ 84 ءى قىسقا ءارى جۇقا بولعان. ناقتى تالاپقا ساي بۇراندالاردى تۇگەندەۋگە ەرىنگەن مەحانيك قولدا بارىن بەكىتە سالعان ەكەن. ارينە، ءار زات ءوز ورنىندا تۇرماعاننان كەيىن، اۋا قىسىمىنا شىداماي، ۇشاقتىڭ الدىڭعى اينەگى جۇلىنىپ كەتكەن... اراعا 5 اي سالىپ كاپيتان لانكاستەر قايتادان ۇشاق شتۋرۆالىنا وتىرىپتى. British Airways كومپانياسىندا زەينەت جاسىنا دەيىن جۇمىس ىستەپ، كەيىننەن EasyJet كومپانياسىندا ۇشقىشتىعىن جالعاستىرعان كورىنەدى.. .
Massaget.kz
