ابايدى ءبىر رومان توڭىرەگىندە عانا ءبىلىپ كەلدىك - ەرلان سىدىقوۆ
ۋنيۆەرسيتەت رەكتورى ەرلان سىدىقوۆ وسى ماقالا ارقىلى ۇلى اقىننىڭ 175 جىلدىق مەرەيتويىنا جان- جاقتى دايىندىق باستالعانىن اتاپ ءوتتى.
«ماقالا قاراپايىم تىلمەن جازىلسا دا، وندا تەرەڭ ويلار مەن باعىتتار ۇسىنىلعان. وكىنىشكە قاراي، ءبىز وسى كۇنگە دەيىن ابايعا تەرەڭ بويلاي الماي كەلەمىز. اسىرەسە، سوۆەت زامانىندا ابايدى حالىققا جاقىنداتقان جوق. ونىڭ پوەزياسىن عانا ۇسىندى. ونىڭ وزىندە دە ءدىن، مۇسىلماندىق، بيلىك، بايلىق تۋرالى ايتقان ولەڭدەرى مەن سوزدەرىن جەتكىزبەدى. اينالىپ كەلگەندە، ابايدىڭ عىلىمي بيوگرافياسىن جازۋعا دا مۇمكىندىك بەرىلمەدى. ونىڭ بارلىعى مۇحتار اۋەزوۆتىڭ «اباي جولى» ەپوپەياسىنىڭ العاشقى نۇسقالارىنىڭ ءوزىن شىعارماي، يدەيانى تاپتىق- پارتيالىق پرينتسيپ توڭىرەگىنە اكەلمەيىنشە قابىلداعان جوق. ءبىز ابايدى سول رومان توڭىرەگىندە عانا ءبىلىپ جۇردىك» ، - دەدى ەرلان سىدىقوۆ ە ۇ ۋ- دا وتكەن جينالىستا.
ونىڭ ايتۋىنشا، جاڭا زامانداعى، تاۋەلسىز قازاقستانداعى جاڭا ۇرپاق تولاسسىز اقپارات داۋىرىندە ءومىر ءسۇرىپ جاتىر.
«قازىر جان- جاقتان كەلىپ تۇسكەن اقپارات لەگىن ەشكىم توقتاتا المايدى. جۇرەگىمىزگە دە، سانامىزعا دا، ميىمىزعا دا كەلىپ جاتىر. وسى تۇرعىدا اسىرەسە جاستار قانداي باعىت ۇستاۋى كەرەك؟ ەل بولىپ قالامىز با؟ ەلدىك قاسيەتتەرىمىزدى ساقتاي الامىز با؟ ۇلت بولىپ ۇييمىز با؟ ءتىلىمىزدى، ءدىلىمىزدى ساقتاي الامىز با؟ الدە سىرتتان كەلگەن ءدۇدامال قۇندىلىقتارعا ەرىپ كەتەمىز بە؟ تۇپتەپ كەلگەندە قازاق بولىپ قالامىز با، جوق پا؟ مىنە، كەشە شىققان ماقالانىڭ نەگىزگى وي- باعىتى، كونتسەپتۋالدى تۇجىرىمى «بىزگە باعىت بەرۋشى كىم؟ » دەگەنگە جاۋاپ بەرىپ وتىر. ول - ۇلى اباي. ابايعا قايتادان كەلەيىك، جاڭاشا كەلەيىك، ابايدىڭ قىزمەتى مەن ومىرىنە كوڭىل بولەيىك. سول ارقىلى ءوزىمىزدىڭ جولىمىزدى انىقتايىق. وسىلايشا، ۇلى ابايدىڭ بىزگەن شىراق ەكەنىن، جول كورسەتۋشى باعىت بەرۋشى ەكەندىگىن وسى ماقالا مەڭزەپ وتىر. ولاي بولسا، ابايعا ءبىز كەرەك ەمەس شىعارمىز، بىزگە اباي كەرەك. ءوزىنىڭ كەزەكتى مەرەيتويىمەن اباي بىزگە تاعى ءبىر مۇمكىندىك بەرىپ وتىر. وسى ماقالا ارقىلى ابايعا تاعى زەر سالىپ، بويتۇمار ەتىپ ۇستاپ، ومىرلىك ستاندارتىمىزعا اينالدىرايىق» ، - دەدى رەكتور.
