ەلوردادا ەرەكشە بالالاردى وقىتاتىن بىلىكتى كادرلار جەتىسپەيدى
پارلامەنت سەناتىنىڭ باسپا ءسوز قىزمەتىنەن ءمالىم ەتكەندەي، دەپۋتات ەدىل مامىتبەكوۆ قالالىق ءماسليحات دەپۋتاتتارىمەن بىرگە ەلوردانى ارالاپ، №95 بوبەكجاي- باقشاسىندا، ومىرلىك قيىن جاعدايدا جۇرگەن بالالار ورتالىعىندا جانە «№1 ارنايى مەكتەپ- ينتەرناتتا» بولدى. بۇگىندە 325 بالانى وقىتۋعا ەسەپتەلگەن مەكتەپ- ينتەرناتتا 527 ادام وقيدى. جالپى نۇر- سۇلتاندا اۋتيزم، سەرەبەرالدى سال اۋرۋى، ەستۋ، كورۋ ورگاندارىنىڭ جانە باسقا دا سىرقاتتارى بار 9 مىڭنان استام بالا تۇرادى. ءماسليحات دەپۋتاتى ز. ءجۇسىپوۆانىڭ ايتۋىنشا، جالپى ءبىلىم بەرەتىن مەكتەپتەر بىلىكتى كادرلاردىڭ جەتىسپەۋشىلىگىنەن ەرەكشە بالالاردى وقىتۋعا دايىن ەمەس. ە. مامىتبەكوۆ ارنايى مەكتەپتەردىڭ جەتىسپەۋى مەن ەرەكشە قاجەتتىلىكتەرى بار بالالاردى الەۋمەتتىك قامتاماسىز ەتۋ ماسەلەلەرىن شەشۋ قاجەتتىگى تۋرالى ءتيىستى ورگاندارعا دەپۋتاتتىق ساۋال جولدايتىنىن جەتكىزدى.
سەناتور سونداي- اق جاڭا تەننيس ورتالىعىنىڭ جۇمىسىمەن تانىسىپ، I-5 (جاستار) اۋدانىنداعى جاڭبىر سۋىن تازارتۋ كارىزىنىڭ قۇرىلىسىمەن تانىستى.
بۇدان بولەك، ەدىل مامىتبەكوۆ دوستىق ۇيىندە قازاقستان حالقى اسسامبلەياسىنىڭ مۇشەلەرىمەن كەزدەستى. دەپۋتات پارلامەنتتىڭ زاڭ شىعارۋ قىزمەتى تۋرالى حاباردار ەتىپ، قابىلدانعان زاڭدار جايىندا ەگجەي- تەگجەيلى ايتىپ بەردى. سونداي- اق دەنساۋلىق ساقتاۋدى دامىتۋدىڭ 2020-2025 -جىلدارعا ارنالعان مەملەكەتتىك باعدارلاماسىنىڭ باسىمدىقتارى مەن ورىندالۋ بارىسى ءتۇسىندىرىلدى.
كەزدەسۋ بارىسىندا قوعامدىق بىرلەستىكتەردىڭ «مەملەكەتتىك ساتىپ الۋ تۋرالى» زاڭدى ورىنداۋ ماسەلەسى دە كوتەرىلدى.
