اقتوبە وبلىسىندا اۋەدەن قۇلاعان «بەيمالىم تەمىر بولشەكتىڭ» نە ەكەنى ءالى انىقتالماي جاتىر

كۋاگەرلەردىڭ ايتۋىنشا، سوپاقشا كەلگەن مەتال «زىمىران بولشەگىنە» ۇقسايدى. نوعايتى اۋىلىنىڭ تۇرعىنى، زەينەتكەر زالجان سۇيەۋوۆ بەيمالىم مەتالدىڭ تۇرعىن ۇيلەرگە قۇلاماعانىنا شۇكىرلىك ەتىپ وتىر. تۇرعىنداردىڭ ايتۋىنشا، اۋداننان كەلگەن كوميسسيا ول ماڭدى قورشاپ، ەشكىمدى جولاتپاي قويعان.

بايعانين اۋدانىنىڭ اكىمى قايرات وتاروۆ تا، وبلىس اكىمدىگى دە، وبلىستىق توتەنشە جاعداي دەپارتامەنتى دە نوعايتىعا بەيمالىم مەتالدىڭ قۇلاعانىن راستادى. ءبىراق ەشقايسىسى دا ونىڭ نە ەكەنىن ايتا الماي وتىر.

قايرات وتاروۆ «اۋىلدىق وكرۋگ اكىمىنەن حابار تۇسكەننەن كەيىن نوعايتىعا كوميسسيا جىبەرىلدى» دەيدى.

- اقپاراتتى نۇر-سۇلتاننان كۇتىپ وتىرمىز، - دەدى 10- قاڭتار كۇنى وبلىس اكىمىنىڭ باسپا ءسوز قىزمەتى ازاتتىق تىلشىسىنە.

توتەنشە جاعداي كوميتەتىنىڭ باسپا ءسوز قىزمەتىنىڭ اتى-ءجونىن ايتپاعان وكىلى «ونداي اقپارات تۇسكەن جوق، بىلمەيمىز» دەپ جاۋاپ بەردى.

2013-جىلى رەسەي مەن قازاقستان «بايقوڭىر» ايلاعىنان ۇشاتىن زىمىران-تاسىعىشتاردىڭ بولشەگى قۇلايتىن ارنايى اۋماق ءۇشىن قازاقستان تەرريتورياسىنان جەر ءبولۋ تۋرالى كەلىسىمگە قول قويعان. وسى ماقساتتا اقتوبە وبلىسىنان 23 مىڭ گەكتار جەر جانە قوستاناي وبلىسىنان شامامەن 41 مىڭ گەكتار جەر بولىنگەن.

«ازاتتىق»

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى