نۇر-سۇلتان، الماتى جانە شىمكەنت قالالارىنىڭ قۇزىرەتى كەڭەيدى
بۇل تۋرالى ق ر ۇلتتىق ەكونوميكا مينيسترلىگىنىڭ باسپا ءسوز قىزمەتىنە سىلتەمە جاساپ قازاقپارات حابارلايدى.
2019-جىلعى 27- جەلتوقساندا مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قازاقستان رەسپۋبليكاسىنىڭ اكىمشىلىك-اۋماقتىق قۇرىلىسى، مەملەكەتتىك باسقارۋ جۇيەسىن جانە بيۋجەتارالىق قاتىناستاردى جەتىلدىرۋ، كرەديتتەۋ جانە ءبىلىم بەرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى.
ۇلتتىق ەكونوميكا مينيسترلىگىندە بۇل زاڭ ق ر پرەزيدەنتىنىڭ جەكەلەگەن جارلىقتارىن، جولداۋلارىن ىسكە اسىرۋ ءۇشىن ازىرلەنىپ، مىنا ماسەلەلەردى شەشەدى:
— فيسكالدىق ورتالىقسىزداندىرۋ شەڭبەرىندە شاعىن جانە ورتا بيزنەستەن تۇسەتىن كورپوراتيۆتىك تابىس سالىعىنىڭ تۇسىمدەرىن جەرگىلىكتى بيۋجەتتەرگە بەرۋ؛
— قازاقستان رەسپۋبليكاسى مەملەكەتتىك كۇزەت قىزمەتى مەن قازاقستان رەسپۋبليكاسى «سىربار» سىرتقى بارلاۋ قىزمەتىندەگى قايتا ۇيىمداستىرۋ؛
— ەكىنشى دەڭگەيلى بانكتەر مەن ميكروقارجىلىق ۇيىمدارعا مەرزىمى 90 كۇننەن اسىپ كەتكەن كەپىلسىز تۇتىنۋشىلىق قارىزدار بويىنشا قىزمەت كورسەتۋدە تۇراقسىزدىق ايىبىن (ايىپپۇل، ءوسىماقى)، كوميسسيالار مەن وزگە دە تولەمدەردى ەسەپتەۋگە جانە تالاپ ەتۋدى بەلگىلەۋ؛
— رەسپۋبليكالىق ماڭىزى بار قالالار مەن استانانىڭ قۇزىرەتىن كەڭەيتۋ؛
— ءبىلىم بەرۋ مەكەمەلەرىن باسقارۋ جانە بيۋجەتتىك اكىمشىلەندىرۋ فۋنكتسيالارىن اۋداندىق دەڭگەيدەن وبلىستىق دەڭگەيگە بەرۋدى شەشۋ.
اۆتورلار حابارلاعانداي، زاڭ ارقىلى 5 كودەكس پەن 25 زاڭعا تۇزەتۋلەر ەنگىزىلەدى.
زاڭ استانانىڭ اتىنىڭ وزگەرۋىنە، بيۋجەتارالىق قاتىناستاردى جەتىلدىرۋگە، رەسپۋبليكالىق ماڭىزى بار قالالار مەن استانانىڭ قۇزىرەتىن كەڭەيتۋگە، سونداي-اق ءبىلىم بولىمدەرىن باسقارۋ فۋنكتسياسىن قايتا بولۋگە بايلانىستى كەيبىر زاڭنامالىق اكتىلەردىڭ جەكەلەگەن نورمالارىن سايكەستەندىرۋگە مۇمكىندىك بەرەدى.
قۇجاتتىڭ ءماتىنىن مينيسترلىكتىڭ رەسمي سايتىنان وقي الاسىزدار.
