كەنجەحان ماتىجانوۆ: اباي - ۇلتىمىزدىڭ رۋحاني تەمىرقازىعى
كەنجەحان ماتىجانوۆتىڭ پىكىرىنشە، مەملەكەت باسشىسى قاسىم-جومارت توقايەۆتىڭ «EgemenQazaqstan» گازەتىندە جارىق كورگەن ماقالاسى ۇلى ويشىل ابايدىڭ 175 جىلدىق مەرەيتويىن الەمدىك دەڭگەيدە اتاپ ءوتۋدىڭ تۇجىرىمدامالىق نەگىزى ىسپەتتى.
سونداي-اق، ول ابايدىڭ الەۋمەتتىك، رۋحاني تۇجىرىمدارى قازاق ءۇشىن قاشاندا اداستىرمايتىن تەمىرقازىق ەكەنىن اتاپ ءوتتى.
«اباي - ۇلتىمىزدىڭ رۋحاني تەمىرقازىعى. جىلدىڭ باسى ق ر پرەزيدەنتى قاسىم-جومارت توقايەۆتىڭ «اباي جانە ХХІ عاسىرداعى قازاقستان» اتتى ماقالاسىمەن باستالۋى ءبىزدىڭ رۋحاني ومىرىمىزدەگى ۇلكەن قۇبىلىستىڭ ءبىرى. بۇل - تەرەڭ ويدى قوزعاعان، وتە سالماقتى ماقالا دەپ ەسەپتەيمىن»، - دەيدى كەنجەحان ماتىجانوۆ
ونىڭ ايتۋىنشا، ەل پرەزيدەنتىنىڭ ابايعا ەرەكشە نازار اۋدارعانىندا ۇلكەن ءمان بار.
«ءومىر ۇلكەن كول، زامانا سوققان جەل»، - دەگەن ويشىل اباي. ۋاقىت وتكەن سايىن ابايدى كەزەڭ-كەزەڭمەن تانىپ كەلەمىز. ابايعا ءارقاشان جاڭا تۇرعىدان ورالىپ كەلىپ وتىرامىز. بيىلعى 175 جىلدىق مەرەيتوي وزگەشە بولماق. ۇلى ابايدىڭ بىزگە وسيەت ەتىپ كەتكەن دۇنيەسى وسى ەلدىڭ ەركىندىگى، حالىقتىڭ بوستاندىعى ەمەس پە؟ مەنىڭ ويىمشا اباي ءبىزدىڭ ۇلتتىق بولمىسىمىزدىڭ ۇلكەن بيىگى، سوندىقتان ابايدى جاڭاشا تانۋ كەرەك جانە ونى جاس ۇرپاققا جاڭاشا ءتۇسىندىرۋ قاجەت. ءبىز اباي كورسەتكەن ۇلى جولدان، اباي كورسەتكەن ادامگەرشىلىك، ۇلتتىق نىسانادان اۋىتقىماۋىمىز كەرەك»، - دەيدى ءتىل مامانى.
