اتىراۋدا مۇز استىنا ءتۇسىپ كەتكەن بالالاردىڭ جاعدايى بەلگىلى بولدى
«پوليتسەيلەر قۇتقارىپ قالعان جاسوسپىرىمدەر شۇعىل تۇردە وبلىستىق بالالار اۋرۋحاناسىنا جەتكىزىلدى. ولاردىڭ جاعدايى اۋىر بولعان جوق، دەگەنمەن، الاڭداۋشىلىق بولدى. بالالار مۇزداي سۋدىڭ استىندا قالىپ قويعان، سالقىن تيگەن. وعان قوسا، ەسەڭگىرەپ قالعان. پنيەۆمونياعا شالدىعۋى ابدەن مۇمكىن ەدى. ءبىراق، قازىر بارلىعى جاقسى. اعزالارى جاس بولعاندىقتان، ساۋىعىپ كەلە جاتىر. ومىرلەرىنە ەشقانداي قاۋىپ جوق»، - دەدى وبلىستىق بالالار اۋرۋحاناسىنىڭ دارىگەرى مۇباراك سارسەنوۆ.
ەسكە سالايىق، قايعىلى وقيعا 4-قاڭتار كۇنى كەشكى ۋاقىتتا بولدى. ءتورت جاس ءوسپىرىم تومارلى كەنتى ماڭىندا جايىق وزەنىنىڭ ۇستىندە ويناپ ءجۇرىپ، مۇز استىنا ءتۇسىپ كەتكەن. بىرەۋى كوز جۇمىپ، ۇشەۋى امان قالدى. ءوز بەتىمەن سۋدان شىعا العان بالالاردىڭ ءبىرى وقيعا تۋرالى حابار بەرگەن.
«كاپيتان قۋاندىق سۇيىندىكوۆ پەن لەيتەنانت تيمۋر بالماعانبەتوۆ حابار تۇسكەننەن كەيىن كومەك كورسەتۋگە بارعان. ولار 2004 جانە 2005 -جىلعى بالالاردى جاعاعا شىعاردى. پوليتسيا قىزمەتكەرلەرىنىڭ ءبىرىنىڭ كيىمىندەگى كامەرادان پوليتسەيلەر وزەن ورتاسىنان ەستىلىپ تۇرعان بالالاردىڭ داۋىسىنا قاراي بارا جاتقانىن كورۋگە بولادى. قۇتقارۋ كەزىندە بالالاردىڭ اياق- قولىنىڭ جانى كەتىپ قالعان. جاسوسپىرىمدەردىڭ ءبىرى: «ماما، سەنى جاقسى كورەمىن» دەپ قالجىراي ايتىپ جاتتى. وكىنىشكە وراي، پوليتسەيلەر ءبىر بالانى قۇتقارا المادى - ول ءتارتىپ ساقشىلارى كەلگەنگە دەيىن سۋ استىنا باتىپ كەتتى»، - دەدى وڭىرلىك پوليتسيا دەپارتامەنتىنىڭ باسپا ءسوز قىزمەتىنەن.
قۇتقارىلعان ءۇش جاس ءوسپىرىم وبلىستىق بالالار اۋرۋحاناسىنا جەتكىزىلدى. 2004 -جىلعى بالانىڭ دەنەسى تابىلدى، ونى سۇڭگۋىرلەر سۋدان الىپ شىقتى.
اۆتورى: ا. سوكولوۆ
