قازاقستاندا حالىقتى ناتيجەلى جۇمىسپەن قامتۋ تەتىكتەرى جەتىلدىرىلدى
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، بيۋدجەت شىعىندارىنىڭ تيىمدىلىگىن ارتتىرۋ ءۇشىن قىسقا مەرزىمدى كاسىپتىك وقىتۋ تەتىگى قايتا قارالدى. ەندى ول وقىتىلعان ادامداردى جۇمىسقا ورنالاستىرۋعا كەپىلدىك بەرەتىن جۇمىس بەرۋشىلەردىڭ وتىنىمدەرى بويىنشا جۇزەگە اسىرىلادى.
جۇمىس بەرۋشىنىڭ قايتا دايارلاۋ كۋرستارى قۇنىنىڭ كەمىندە 50 پايىزىن قوسا قارجىلاندىرۋ شارتىمەن ەڭبەكشارتى بويىنشا جۇمىس ىستەيتىندەردى كاسىپتىك دايارلاۋ جونىندەگى تەتىك ەنگىزىلدى. بۇل شارا ەڭبەكشارتى بويىنشا جۇمىس ىستەيتىندەرگە ەڭبەك جولىنىڭ بارلىق كەزەڭدەرىندە ءبىلىم الۋعا مۇمكىندىك بەرەدى. سونداي-اق جۇمىس بەرۋشىلەردىڭ ءوز قىزمەتكەرلەرىنىڭ جاڭا ءبىلىم مەن داعدىلاردى الۋىنا مۇددەلىلىگىن ارتتىرادى.
كوپبالالى جانە تابىسى از وتباسى مۇشەلەرىن كاسىپكەرلىككە تارتۋ ءۇشىن ولارعا ميكروكرەديتتەر جىلدىق 4 پايىزدان اسپايتىن پايىزدىق ستاۆكامەن 7 جىلعا دەيىنگى مەرزىمگە جەڭىلدىكتى شارتتارمەن بەرىلەدى.
سونىمەن قاتار، حالىقتىڭ بارلىق ساناتتارى ءۇشىن ءبىرىڭعاي مەملەكەتتىك گرانتتاردىڭ مولشەرى بەلگىلەندى - 200 ا ە ك. سونىمەن بىرگە كوپبالالى جانە تابىسى از وتباسىلاردىڭ مۇشەلەرى الدىن الا وقىتۋسىز گرانت الۋعا قۇقىلى.
جاستاردى مەملەكەتتىك قولداۋ شارالارى قايتا قارالدى. جاستار تاجىريبەسىنە 2020-جىلدان باستاپ قوسىمشا ەكى جاڭا قۇرال - «ءبىرىنشى جۇمىس ورنى» جانە «ۇرپاقتار كەلىسىمشارتى» جوبالارى ەنگىزىلدى.
«ءبىرىنشى جۇمىس ورنى» جوباسى 29 جاستان اسپاعان، ونىڭ ىشىندە NEET ساناتىنداعى (جۇمىس ىستەمەيتىن جانە بىلىكتىلىگىن ارتتىرمايتىن جانە وقىمايتىن) ازاماتتارعا، جۇمىس تاجىريبەسى جوق، ءبىلىم بەرۋ ۇيىمدارىنىڭ تۇلەكتەرىنە، ەڭبەككە جارامدى مۇگەدەكتەرگە ءبىرىنشى جۇمىس ورنىنا جۇمىسقا ورنالاسۋعا مۇمكىندىك بەرەدى.
«ۇرپاقتار كەلىسىمشارتى» جوباسى زەينەتكەرلىك جاسقا جەتكەن جۇمىس ىستەيتىن قىزمەتكەردى كەيىننەن اۋىستىرا وتىرىپ، جۇمىسقا ورنالاستىرۋدى كوزدەيدى.
ەرىكتى تۇردە قونىس اۋدارۋعا قاتىسۋعا نيەت بىلدىرگەن ازاماتتاردى قامتۋدى كەڭەيتۋ ءۇشىن قونىس اۋدارۋشىلاردىڭ شىققان وڭىرلەرىنىڭ قاتارىنا الماتى قالاسى ەنگىزىلدى. قونىس اۋدارۋشىلاردى قابىلداۋ وڭىرلەرىنە اقمولا جانە قاراعاندى وبلىستارى قوسىمشا ەنگىزىلدى، بۇل ەڭبەك كۇشى تاپشى وڭىرلەردى قاجەتتى ەڭبەك رەسۋرستارىمەن قامتاماسىز ەتىپ قانا قويماي، قونىس اۋدارۋشىلار ءۇشىن تۇرعىلىقتى جەردى تاڭداۋعا قوسىمشا مۇمكىندىك بەرەدى.
قونىس اۋدارۋشىلاردى تۇرعىن ۇيمەن قامتاماسىز ەتۋ ماقساتىندا تۇرعىن ۇيلەردى سالۋ جانە ساتىپ الۋ مەحانيزمدەرىن ەلدىڭ بارلىق وڭىرلەرىنە تاراتۋ ۇسىنىلادى. بۇل رەتتە، يندۋستريا جانە ينفراقۇرىلىمدىق دامۋ مينيسترلىگى «ەڭبەك» باعدارلاماسىنىڭ ەڭبەك كۇشى مول وڭىرلەردەن قونىس اۋدارۋشىلار ءۇشىن تۇرعىن ءۇي سالۋ ماسەلەلەرى جونىندەگى وپەراتورى بولىپ بەلگىلەنەدى.
جوعارىدا كورسەتىلگەن شارالار حالىقتىڭ الەۋمەتتىك جاعىنان وسال توپتارى قاتارىنان، ونىڭ ىشىندە NEET ساناتىنان كوپ ازاماتتاردى ەكونوميكالىق قىزمەتكە تارتۋعا مۇمكىندىك بەرەدى.
