پرەزيدەنت ۇكىمەتكە سەمەي قالاسىن الەۋمەتتىك-ەكونوميكالىق تۇرعىدان كەشەندى تۇردە دامىتۋدى تاپسىردى
سونىڭ ىشىندە سەمەي قالاسىنا لايىقتى قۇرمەت كورسەتۋ دە بار، دەپ حابارلايدى قازاقپارات.
ماقالادا پرەزيدەنت ابايدىڭ تۇلعاسى مەن مۇراسىن ۇلىقتاۋ شەتەلدەردە دە جالعاساتىنىن، رەسەيدەگى، فرانسياداعى، ۇلى بريتانياداعى جانە باسقا دا مەملەكەتتەردەگى قازاقستاننىڭ ەلشىلىكتەرى جانىنان «اباي ورتالىقتارىن» قۇرۋ جوسپارلانعانىن ايتادى.
«شىعىس قازاقستان وبلىسىنىڭ اقشوقى ەلدى مەكەنىندەگى قۇنانباي وسكەنباي ۇلى اۋلەتىنىڭ قورىمى اباتتاندىرىلادى. سونىمەن قاتار، اباي تۇلعاسىن جوعارى دارەجەدە دارىپتەۋ ءۇشىن ۇكىمەت مىناداي شارالاردى قولعا الۋى كەرەك دەپ ەسەپتەيمىن. سەمەي ءوڭىرى - قازاق تاريحىنداعى كيەلى ولكەنىڭ ءبىرى. سوندىقتان، ەلدىڭ رۋحاني دامۋىندا ەرەكشە ورنى بار سەمەي قالاسىن تاريحي ورتالىق رەتىندە بەلگىلەگەن ءجون. ۇلى اباي مەن شاكارىمنىڭ، مۇحتار اۋەزوۆتىڭ كىندىك قانى تامعان ءوڭىر ايرىقشا قۇرمەتكە لايىق. وسىعان وراي، شاھاردى الەۋمەتتىك- ەكونوميكالىق تۇرعىدان كەشەندى تۇردە دامىتىپ، ونداعى تاريحي- مادەني نىسانداردى جاڭا تالاپقا ساي جاڭعىرتامىز. ۇكىمەتكە بۇل ماسەلەگە بايلانىستى ءتيىستى شارالار قابىلداۋدى تاپسىرامىن»، - دەپ جازادى مەملەكەت باسشىسى.
سونىمەن قاتار، قاسىم-جومارت توقايەۆ مەرەيتوي جىلى اياسىندا ابايدىڭ قاستەرلى مەكەنى - ايگىلى جيدەبايدى اباتتاندىرىپ، ۇلى اقىننىڭ رۋحىنا تاعزىم ەتۋگە كەلەتىن جۇرتشىلىققا قولايلى جاعداي جاساۋ قاجەتتىگىن دە اتاپ وتەدى.
«ابايدىڭ «جيدەباي-ءبورىلى» مەملەكەتتىك تاريحي-مادەني جانە ادەبي- مەموريالدىق قورىق-مۋزەيىنە ەرەكشە كوڭىل ءبولىپ، عىلىمي-تانىمدىق جۇمىستارمەن اينالىساتىن ورتالىققا اينالدىرۋ كەرەك. جيدەبايدا مۋزەيگە ارنايى لايىقتالعان «اباي مۇراسى» اتتى جاڭا عيمارات سالۋ قاجەت. 1918-جىلى سەمەي قالاسىندا مۇحتار اۋەزوۆ پەن جۇسىپبەك ايماۋىتوۆ نەگىزىن قالاعان، 1992-جىلدان بەرى قايتا شىعا باستاعان «اباي» جۋرنالىنا مەملەكەت تاراپىنان قولداۋ كورسەتۋ كەرەك. وسى جانە باسقا دا اۋقىمدى شارالار ۇلى ابايدىڭ رۋحىنا تاعزىم ەتىپ، ونىڭ مول مۇراسىن دارىپتەۋ ءۇشىن وتكىزىلمەك. ەندەشە، بۇكىل قازاقستان حالقىن وسى يگى باستاماعا بەلسەنە اتسالىسۋعا شاقىرامىن»، - دەلىنگەن ماقالادا.
