ادەبيەت جانە ونەر سالاسىنداعى مەملەكەتتىك سىيلىق اباي اتىنداعى سىيلىق دەپ اتالاتىن بولادى
بۇل تۋرالى پرەزيدەنت قاسىم-جومارت توقايەۆتىڭ «اباي جانە ХХІ عاسىرداعى قازاقستان» اتتى ماقالاسىندا ايتىلدى، دەپ حابارلايدى قازاقپارات.
«تامىز ايىندا سەمەي قالاسىندا يۋنەسكومەن بىرلەسىپ وتكىزىلەتىن «اباي مۇراسى جانە الەمدىك رۋحانيات» اتتى حالىقارالىق عىلىمي-پراكتيكالىق كونفەرەنسيا ەڭ باستى شاراعا اينالادى. سونداي-اق، قازان ايىندا نۇر-سۇلتان قالاسىندا «اباي جانە رۋحاني جاڭعىرۋ ماسەلەلەرى» دەگەن تاقىرىپتا حالىقارالىق كونفەرەنسيا وتەدى. بۇل جيىنداردا ابايدىڭ تۇلعاسى مەن مۇراسى جان-جاقتى زەردەلەنىپ، ونىڭ شىعارماشىلىعىن ХХІ عاسىرداعى جاڭا قازاقستاننىڭ يگىلىگىنە پايدالانۋعا جول اشىلادى» دەپ جازدى پرەزيدەنت.
مەملەكەت باسشىسى اتاپ وتكەن ماڭىزدى جوبانىڭ ءبىرى - ۇلى اقىننىڭ شىعارمالارىن ون تىلگە اۋدارىپ، باسىپ شىعارۋ. اتاپ ايتقاندا، اباي ەڭبەكتەرى اعىلشىن، اراب، جاپون، يسپان، يتاليان، قىتاي، نەمىس، ورىس، تۇرىك، فرانسۋز تىلدەرىنە ءتارجىمالانادى. اقىننىڭ ءومىرى، مۇراسى، قازاق مادەنيەتىن دامىتۋداعى ءرولى تۋرالى بىرنەشە دەرەكتى فيلم جانە «اباي» تەلەسەريالى تۇسىرىلەدى.
سونداي-اق، مەملەكەت باسشىسى بۇدان بىلاي ادەبيەت جانە ونەر سالاسىنداعى ۇزدىك شىعارمالارعا بەرىلەتىن مەملەكەتتىك سىيلىق ەندى اباي اتىنداعى مەملەكەتتىك سىيلىق دەپ اتالاتىنىن ءمالىم ەتتى.
«اقىن تويىنان ونەر سالاسى دا تىس قالمايدى. رەسپۋبليكالىق جانە حالىقارالىق دەڭگەيدە تەاتر جانە مۋزىكا فەستيۆالدەرى وتەدى. بيىلعى بايگەلەر اباي شىعارماشىلىعىنا ارنالادى. ادەبيەت جانە ونەر سالاسىنداعى ۇزدىك شىعارمالارعا بەرىلەتىن مەملەكەتتىك سىيلىق ەندى اباي اتىنداعى مەملەكەتتىك سىيلىق دەپ اتالاتىن بولادى» دەپ جازدى ول.
ودان بولەك، قاسىم-جومارت توقايەۆ ابايدىڭ 175 جىلدىعى شەتەلدەردە دە تويلاناتىنىن جەتكىزدى: «ابايدىڭ تۇلعاسى مەن مۇراسىن ۇلىقتاۋ شەتەلدەردە دە جالعاسادى. رەسەيدەگى، فرانسياداعى، ۇلى بريتانياداعى جانە باسقا دا مەملەكەتتەردەگى قازاقستاننىڭ ەلشىلىكتەرى جانىنان «اباي ورتالىقتارىن» قۇرۋ جوسپارلانىپ وتىر. بۇل مادەني ءىس-شارالاردى ىسىراپشىلدىققا جول بەرمەي ۇيىمداستىرۋ قاجەت».
ايتا كەتەيىك، بۇعان دەيىن «قازاقپارات» اگەنتتىگى اقوردانىڭ رەسمي سايتىنا سىلتەمە جاساي وتىرىپ، قاسىم- جومارت توقايەۆتىڭ «اباي جانە ХХІ عاسىرداعى قازاقستان» اتتى ماقالاسىن جاريالاعان بولاتىن.
