تۇرعىن ءۇي-كوممۋنالدىق شارۋاشىلىق ماسەلەلەرى بويىنشا جاڭا زاڭ كۇشىنە ەندى
بۇل جونىندە يندۋستريا جانە ينفراقۇرىلىمدىق دامۋ مينيسترلىگىنە سىلتەمە جاساپ قازاقپارات حابارلايدى.
تۇرعىن ءۇي-كوممۋنالدىق شارۋاشىلىق سالاسىن رەتتەيتىن بۇل زاڭ قازىرگى تاڭدا كەزىگىپ وتىرعان سالاداعى ءبىرقاتار ماسەلەلەردى شەشەدى. ونىڭ ىشىندە كوپ پاتەرلى تۇرعىن ۇيلەردى كوندومينيمۋم نىسانى رەتىندە تىركەۋدى رەتتەيدى جانە وڭتايلاندىرادى، پاتەرلەر جانە تۇرعىن ەمەس ءۇي-جايلار يەلەرىنىڭ ءۇيدى باسقارۋداعى قۇقىقتارىن قامتاماسىز ەتەدى، كوپ پاتەرلى ۇيلەردى باسقارۋشىلار مەن باسقارۋشى كومپانيالار قىزمەتتەرىن رەتتەيدى، ورتاق مۇلىككە كۇردەلى جوندەۋ جۇمىستارىن جۇرگىزۋدىڭ جاڭا تەتىكتەرىن ەنگىزەدى، پاتەرلەردى پايدالانۋ، ولاردى تۇرعىن ەمەس ءۇي-جايلارعا اۋىستىرۋدا تۇرعىنداردىڭ كەلىسىمىن الۋ سياقتى ماسەلەلەردى رەتتەيدى، جەدەلساتىلاردى قاۋىپسىز پايدالانۋدى قامتاماسىز ەتۋ ءۇشىن ۇلتتىق ستاندارتتار قولدانۋدى، قىزمەت كورسەتۋشىلەردى اتتەستاتتاۋدان وتكىزۋدى جانە تۇرعىن-ءۇي كوممۋنالدىق شارۋاشىلىق سالاسىن سيفرلاندىرۋدى قاراستىرادى.
ايتالىق، بۇعان دەيىن ورتاق مۇلىكتىڭ دۇرىس پايدالانىلمايتىنى تۋرالى ازاماتتار تاراپىنان كوپتەگەن ارىز-شاعىم ايتىلىپ كەلدى. ەندى جاڭا زاڭ بويىنشا كوپ پاتەردى ءۇيدى كوندومينيمۋم نىسانى رەتىندە تىركەۋ كەرەك. ونىڭ جالپى اۋدانى انىقتالىپ، مۇلىك يەسىنىڭ ءارقايسىنىڭ جەكە ۇلەسى ايقىن كورسەتىلەدى. ياعني، ءۇيدى باسقارۋدا تەڭ قۇقىققا يە بولادى. پاتەر يەلەرىنىڭ كەلىسىمىنسىز جالپى مۇلىكتى ساتۋعا نەمەسە جالعا بەرۋگە زاڭمەن تىيىم سالىنادى. كەيبىر قۇرىلىس كومپانيالاردى ءۇيدى تىركەمەي تۇرىپ، جەرتولە، ىرگە قاباتتار سياقتى ورتاق مۇلىكتى ساتىپ جىبەرەتىن. ەندى وعان دا توسقاۋىل قويىلىپ، كوندومينيمۋمنىڭ ناقتى اۋدانى ءۇيدى جوسپارلاۋ بارىسىندا ايقىندالادى.
كوپ پاتەرلى ۇيلەردى بۇعان دەيىن نەگىزىنەن پاتەر يەلەرى كووپەراتيۆتەرى باسقارىپ كەلدى. ولاردىڭ قىزمەتىنە كوپتەگەن سىندار ايتىلدى. نەمەسە قۇرىلىس كومپانيالارى مەنشىك يەلەرىمەن كەلىسپەي، وزدەرىنىڭ باسقارۋشى كومپانيالارىنىڭ قىزمەتىن تاڭاتىن. جاڭا زاڭ بويىنشا پاتەرلەر مەن تۇرعىن ەمەس ءۇي-جايلاردىڭ يەلەرى باسقارۋدىڭ ەكى فورماسىنىڭ ءبىرىن تاڭداۋى ءتيىس: زاڭدى تۇلعا رەتىندە مۇلىك يەلەرىنىڭ بىرلەستىگىن (م ي ب) قۇرادى نەمەسە بارلىعى بىرلەسىپ باسقاراتىن قاراپايىم سەرىكتەستىك بولادى. ەكى تۇرىندە دە «ءبىر ءۇي - ءبىر بىرلەستىك نەمەسە قاراپايىم سەرىكتەستىك - ءبىر شوت» قاعيداتى جۇمىس ىستەيدى. ياعني، ءار ءۇيدىڭ تۇرعىندارى ءوز قارجىلارىن وزدەرى باسقارىپ، پايدالانا الادى. نەمەسە ءۇيدى باسقارۋ مىندەتىن باسقارۋشى ادامعا نەمەسە باسقارۋشى كومپانياعا جۇكتەي الادى.
زاڭ بويىنشا پاتەر يەلەرىنىڭ جيىنى جوعارعى باسقارۋ ورگانى بولىپ سانالادى. ياعني، ورتاق مۇلىكتى باسقارۋ جانە ونى كۇتىپ-ۇستاۋ ماسەلەلەرىن كەڭەسىپ شەشەدى. ءۇي كەڭەسىنىڭ، رەۆيزيالىق كوميسسيانىڭ مۇشەلەرىن سايلاپ، قىزمەتىنە ريزا بولماسا ولاردىڭ وكىلەتتىلىكتەرىن توقتاتا الادى. ءۇيدى باسقارۋ فورماسىن تاڭداپ، شىعىندار جوسپارىن بەكىتەدى. ۇيگە كۇردەلى جوندەۋ جۇرگىزۋ، ورتاق مۇلىكتى جالعا بەرۋ سياقتى ماڭىزدى شەشىمدەردى قابىلدايدى.
زاڭدا ءۇيدى باسقارۋ مىندەتى جۇكتەلەتىن ادام نەمەسە باسقارۋشى كومپانياعا ناقتى تۇسىنىك بەرىلىپ، ولاردىڭ قۇقىقتارى مەن مىندەتتەرى انىق كورسەتىلگەن. ورتاق مۇلىك نىساندارىنا كۇردەلى جوندەۋ جۇرگىزۋدىڭ جاڭا تەتىكتەرى ەنگىزىلەدى. مەنشىك يەلەرىنىڭ بۇل ماقساتقا قارجى جيناۋ ءتارتىبى، قاۋىپسىزدىگىن قامتاماسىز ەتۋ جانە ساقتاندىرۋ جايى، جيناقتاۋشى شوتقا سالىناتىن قاراجات كولەمى ايقىندالادى.
سونداي-اق، جاڭا زاڭ تالاپتارى بويىنشا تۇرعىن ەمەس ءۇي-جايلار پاتەرلەردەن وقشاۋلاندىرىلىپ، وزدەرىنىڭ بولەك ەسىكتەرى بولۋى ءتيىس. جانە بۇل تالاپ ەندى حوستەلدەرگە دە تارالادى. تۇنگى مەزگىلدە تىنىشتىق ساقتاۋ، اينالاداعى كىسىلەردىڭ مازاسىن الاتىن شۋ شىعاراتىن جۇمىستار جۇرگىزبەۋ، تەمەكىنى ارناۋلى ورىنداردا عانا تارتۋ سياقتى وزگە دە تالاپتار ايقىندالادى.
جەدەلساتىلاردى قاۋىپسىز پايدالانۋ سالاسىنداعى ماسەلەلەردى شەشۋ ءۇشىن ءبىرقاتار شارالار قاراستىرىلعان. بۇل ماقساتتا ەندى ۇلتتىق ستاندارت ازىرلەنىپ، قىزمەت كورسەتۋمەن اينالىساتىن زاڭدى تۇلعالاردى اتتەستاتتاۋ كوزدەلگەن. سالاداعى جەرگىلىكتى اتقارۋشى ورگاندار مەن ۋاكىلەتتى ورگاننىڭ قۇزىرەتى ايقىندالادى.
تۇرعىن ءۇي كوممۋنالدىق سالادا بارلىق بيزنەس ۇردىستەردىڭ اشىقتىعىن قامتاماسىز ەتۋ جانە بارلىق تاراپتىڭ ءوزارا ءىس-ارەكەتىن جاقسارتۋ ماقساتىندا سالانى سيفرلاندىرۋ شارالارى اتقارىلادى. ول ءۇشىن ەلەكتروندىق اقپاراتتىق رەسۋرستار مەن اقپارات جۇيەلەرى ەنگىزىلەدى.
جالپى العاندا، جاڭا زاڭ كوپ پاتەرلى ۇيلەردى كۇتىپ-ۇستاۋدى جاقسارتۋعا، مۇلىك يەلەرى بىرلەستىكتەرىنىڭ قىزمەتىن جاڭا دەڭگەيگە كوتەرۋگە، پاتەرلەر مەن تۇرعىن ەمەس ءۇي-جايلار يەلەرىن ورتاق مۇلىكتى باسقارۋعا جانە تۋىندايتىن ماسەلەلەردى شەشۋگە بەلسەنە اتسالىسۋعا ىنتالاندىرۋى ءتيىس.
