ساپالى مۋلتفيلم شىعارۋدى زاڭدى تۇردە بەكىتۋ كەرەك - جانىبەك ورازالى
«بىزدە انيماتسيالىق كينو سالاسى وسى كەزگە دەيىن دامىماعان دەپ ايتىلىپ كەلدى. شىنىمەن دە، بۇعان دەيىن ماماندار باسقا سالاعا كەتىپ قالىپ ءجۇردى. بۇگىندە قازاقستاندا انيماتورلار دەڭگەيى ءوستى دەپ ايتا الامىز، ولار جاڭا تەحنولوگيالاردى يگەرگەن. اتاپ ايتقاندا، «مۇزبالاق» تولىقمەتراجدى انيماتسيالىق فيلمى ءتۇرلى جۇلدەلەردى الدى. وسى ماپاراتتار - ۇلكەن جەتىستىك. بۇل، قازاق انيماتسيالىق كينوسىنىڭ مارتەبەسى عانا ەمەس، سونىمەن قاتار بىزدەگى مامانداردىڭ جوعارى بىلىكتىلىگىن بىلدىرەدى. وسىنىڭ ءوزى ءبىزدىڭ ماماندار ساپالى ءونىم جاساي الاتىندىعىن بايقاتىپ وتىر» ، - دەدى ج. ورازالى.
مۇنىمەن قوسا ول وتكەن جىلدىڭ اياعىندا ەلوردادا «ÁMEN Animation film festival» اتتى انيماتسيالىق كينوفەستيۆال وتكەنىن ەسكە سالدى.
«بۇل شاراعا قازاقستان وڭىرلەرىندە انيماتسيالىق كينو سالاسىندا جۇمىس ىستەپ جۇرگەن ستۋديالار كەلدى. ارداگەر مەيماندار دا ارنايى شاقىرتىلدى. فورۋم وتە جوعارى دەڭگەيدە ءوتتى. ەندى فەستيۆالدى ءداستۇرلى تۇردە ۇيىمداستىرۋدى جوسپارلاپ وتىرمىز» ، - دەدى قاۋىمداستىق ءتوراعاسى.
ونىڭ سوزىنە قاراعاندا، تولىقمەتراجدى مۋلتفيلمدەردى شىعارۋ ءۇردىسىن زاڭدى تۇردە بەكىتۋ كەرەك.
«بۇرىن جىلىنا 5-6 قىسقامەتراجدى انيماتسيالىق فيلم، 2-3 جىلدا ءبىر تولىقمەتراجدى مۋلتفيلم شىقسا، قۋاناتىنبىز. بىلتىر «مۇزبالاق» پەن «كۇلتەگىن» تولىقمەتراجدى فيلمى شىعارىلدى. وسى ورايدا قاۋىمداستىق ءتيىستى ۇسىنىستاردى جاساپ وتىر. ياعني مەملەكەت زاڭدى تۇردە جىلىنا 1-2 تولىقمەتراجدى، 10 قىسقامەتراجدى مۋلتفيلمدى شىعارۋدى بەكىتۋ كەرەك دەپ ويلايمىز. بۇگىندە انيماتسيالىق كينو سالاسىندا بەلسەندى جۇمىس ىستەپ كەلە جاتقان جالعىز «Balapan» تەلەارناسى عانا. وتە از قارجىمەن قانشاما ساپالى ونىمدەر شىعىپ جاتىر» ، - دەدى جانىبەك ورازالى.
