بەيىمبەت مايليننىڭ ءىلياس جانسۇگىروۆكە جازعان حاتى
كۇن شىعادى، باتادى. كەيدە اپتاپ قىزدىرادى، كەيدە سامال جەل ەسەدى، سامالدى شاڭ ارالاسىپ، ءتۇتىننىڭ تۇنشىقتىراتىن كەزى دە بولادى.
جالعىز كينومىز بار. كۇن ارا جاڭا سۋرەتتەرى بولادى. بارامىز. ۇرىسقان ادامداي قىرىنداپ، ءار جەردە جالعىزدان وتىرامىز. ءبىراق جۇمىسقا مۇمكىندىك بار. سەن جەر سوقتىرىپ كەتسەڭ دە، كالەنداردى ءبىتىرىپ كەلەم. 15-كۇنى تاپسىرعالى وتىرمىن. سەنىڭ «ازىرلەگەن» ماتەريالدارىڭدى 8-بەت قىلىپ قانا الدىم. ونىڭ ءۇشىن ۇرسام دەسەڭ ءوزىڭ ءبىل. «قازيزداتقا» بەرگەن ءبىر رومانىم بار ەدى عوي («سادىق»)، سول شىركىن ۇناڭقىراماي قالىپ قايتا جازۋعا كىرىستىم. اتىن «تارتىس» قويماقشىمىن. بۇرىنعى جازعانىمنىڭ ءبىرسىپىرا جەرىن پايدالاندىم. قالعانىن تىڭنان قوسىپ جاتىرمىن. بيىل جاز قايتسە دە بىتىرەم دەپ وزىمە سەرت بەردىم. «كوزىلدىرىك» (پەسا) جورنالعا باسىلىپ ەدى، كىتاپ بولىپ تا شىقتى. شىققان سوڭ بىرەۋىن جىبەرەرمىن. «جاڭا ادەبيەتتىڭ» 5-سانىنا شەيىن شىقتى. 6-سانى وسى يۋننىڭ 15-20-سىندا شىعادى. 7-سانى باسپادا تەرىلىپ جاتىر. 8-9-ساندارى يۋل ىشىندە شىعادى. جىبەرەتىن ماتەريالىڭ بولسا، تەز جىبەر. ءبىرتالاي حابار ايتتىم. سەندەي ادامعا وسى دا جەتەر. ازسىنساڭ كوشكە بەرگەن تايىڭدى ال.
ايتپاقشى، «ناركومپروستىڭ» جۇرتتا قالعان ءشوپ-شارىنىڭ ىشىندە سەنىڭ ءبىر ۇلكەن قولجازباڭ ءجۇر ەكەن. بالالار ەرتەگىسى، لەرمونتوۆتىڭ «شەركەستەر» دەگەنى، قازاقستاننىڭ 5 جىلدىعىنا ارناپ جازعان ولەڭىڭ، مەن جيىپ الىپ ۇيگە اپارىپ قويدىم. كەرەك دەسەڭ ايتارسىڭ. كەرەك ەمەس دەسەڭ ونىڭدى ايت، مەن دە تاستاپ كەتەم. جۇرتتىڭ بوقتىعىن جيىپ كوشىپ باراتىن ادامىڭ مەن ەمەس.
قىزىلوردادا گازەت شىققالى جاتىر. ءبىرىنشى سانى وسى يۋننىڭ 20-كۇنى شىعادى. اتى «سىر بويى». جازۋشىلارى تولىپ جاتىر. بەلسەندى ادامدارى: مانسۇر، ءابدىراقىمان (مۇستاپانىڭ)، ءماتىجان. وقشاۋ جازۋشىسى مەن. سىرت وسەگى: «بۇل گازەت «ەڭبەكشى قازاق»-تان اسىپ تۇسەر دەسەدى. كىم ءبىلسىن، قايتكەندە دە ءبىرىنشى سانىن الىپ وقۋعا اسىققانىڭ ءجون.
اياعى بىتپەي قالدى. اسىقتىم حوش!
بەيىمبەت (قولتاڭبا)
1929 ج. 12-ماۋسىم
اسەت اقمولدانىڭ الەۋمەتتىك جەلىدەگى پاراقشاسىنان الىندى
