قازاقستاننىڭ جاس وسپىرىمدەر قۇراماسى لوزانناداعى قىسقى وليمپياداعا اتتاندى
جاستاردى وليمپيادا ويىندارىنا شىعارىپ سالۋ ءراسىمى ەلورداداعى «سارىارقا ۆەلوترەگىندە ءوتتى. سالتاناتتى شاراعا ق ر مادەنيەت جانە سپورت مينيسترلىگى دەنە شىنىقتىرۋ جانە سپورت كوميتەتىنىڭ ءتوراعاسى سەرىك ساپيەۆ پەن ق ر ۇلتتىق وليمپيادا كوميتەتى سپورت ديرەكتسياسىنىڭ ديرەكتورى ەلسيار قاناعاتوۆ قاتىستى.
الداعى قىسقى وليمپيادا ويىندارىندا قازاقستاننىڭ جاس وسپىرىمدەر قۇراماسىنىڭ ساپىنداعى 26 اتلەت ەل نامىسىن قورعايدى. 15-18 جاس ارالىعىنداعى سپورتشىلار توعىز سپورت تۇرىنەن باقتارىن سىنايدى. قىسقى ويىنداردىڭ اشىلۋى مەن جابىلۋى لوزاننادا وتەدى.
«بۇل شىنىمەن دە ماڭىزدى ءارى كەشەندى سپورتتىق جارىس. قازاق ەلىنىڭ دەلەگاتسياسى ءۇشىنشى رەت جاس وسپىرىمدەر اراسىنداعى قىسقى وليمپيادا ويىندارىنا قاتىسادى. ۇلتتىق وليمپيادا كوميتەتىنىڭ اتىنان جاس سپورتشىلارعا ساتتىلىك تىلەيمىز. بۇل سپورتتىق سايىستان الار تاجىريبەلەرىڭىز ۇشان-تەڭىز بولماق. قازاق ەلىنىڭ تۋىن كوتەرىپ، ءانۇرانىن شىرقاتىپ قايتۋعا تىلەكتەسپىز»، - دەدى سالتاناتتى جيىندا ەلسيار قاناعاتوۆ.
ءوز كەزەگىندە سەرىك ساپيەۆ جاستاردىڭ ەلىمىزدىڭ ايبىنىن اسقاقتاتىپ قايتۋىنا تىلەكتەس ەكەنىن ءبىلدىردى.
«جاس وسپىرىمدەر اراسىنداعى قىسقى وليمپيادا ويىندارىنا ساناۋلى كۇن قالدى. وسى وليمپيادا سىزدەردىڭ وتانىمىزدىڭ ابىرويىن لايىقتى قورعاپ، الەم الدىندا ەلىمىزدى تاعى ءبىر قىرىنان تانىتار دەپ سەنىم بىلدىرەمىز. جارىس جولىندا سىزدەرگە ساتتىلىك جولداس بولسىن»، - دەدى ول.
