ەۋروپالىق وداق يراننىڭ يادرولىق كەلىسىمنەن باس تارتقانىنا وكىنىش ءبىلدىردى
بۇل تۋرالى ءوزىنىڭ Twitter- دەگى ميكروبلوگىندا ەۋروپالىق وداقتىڭ شەتەل ىستەرى جانە قاۋىپسىزدىك ساياساتى جونىندەگى جوعارى وكىلى جوزەپ بوررەل جازدى، دەپ حابارلايدى قازاقپارات.
«يراننىڭ جان-جاقتى قامتىلعان بىرلەسكەن ءىس-قيمىلدار جوسپارى بويىنشا جاساعان سوڭعى شەشىمىنە وكىنىش بىلدىرەمىز. ءبىز ادەتتەگىدەي ماگاتە تاراپىنان جاسالاتىن مونيتورينگتىڭ ناتيجەلەرىنە ءۇمىت ارتامىز»، - دەپ جازدى ول دۇيسەنبى كۇنى.
«وڭىرلىك جانە جاھاندىق قاۋىپسىزدىك ءۇشىن يادرولىق كەلىسىمدى تولىق ىسكە قوسۋ اسىرەسە بۇگىنگى تاڭدا ەڭ ماڭىزدى ماسەلەلەردىڭ ءبىرى»، - دەگەن پىكىرىن ءبىلدىردى ە و ديپلوماتياسىنىڭ باسشىسى.
ج. بوررەل ماسەلەنىڭ شەشىمىن تابۋ ءۇشىن قىزىعۋشىلىق تانىتقان بارلىق تاراپتارمەن جۇمىستى جالعاستىرا بەرەتىنىن ايتتى.
ايتا كەتەيىك، 2015-جىلدىڭ شىلدە ايىندا ب ۇ ۇ قاۋىپسىزدىك كەڭەسى يراننىڭ يادرولىق باعدارلاماسى بويىنشا جاھاندىق قىرىپ-جويۋ قارۋلارىن تاراتپاۋدىڭ شەشۋشى قۇرالى بولىپ تابىلاتىن جان-جاقتى قامتىلعان بىرلەسكەن ءىس-قيمىلدار جوسپارىن (ج ق ب ءى ج) ءبىراۋىزدان ماقۇلداعان بولاتىن.
ج ق ب ءى ج يران جانە حالىقارالىق قولداۋشى «التىلىق» (ا ق ش، فرانسيا، ۇلى بريتانيا، گەرمانيا، قىتاي، جانە رەسەي) اراسىندا جاسالعان بولاتىن.
تەگەران سانكسيالار الىنىپ تاستالعان جاعدايدا، اتوم سالاسىندا ءوزىنىڭ ءوندىرىسىن شەكتەۋگە كەلىستى.
2018-جىلى سانكسيالاردى قايتا ىسكە قوسقان ا ق ش ج ق ب ءى ج- دەن شىعىپ كەتتى. بۇعان جاۋاپ رەتىندە تەگەران يادرولىق كەلىسىم اياسىنداعى ءوزىنىڭ مىندەتتەمەلەرىن شەكتەي باستادى.
يراننىڭ سىرتقى ىستەر مينيسترلىگى جەكسەنبى كۇنى كەشكىسىن ج ق ب ءى ج- دان باس تارتۋ بويىنشا ءوزىنىڭ كەزەكتى قادامىن جاسادى. ەندى يراننىڭ يادرولىق باعدارلاماسىندا كولەم مەن دەڭگەيگە قاتىستى ەشقانداي شەكتەۋلەر بولمايدى.
