پرەزيدەنت تاپسىرماسى: بۇقتىرماعا كوپىر سالۋ جۇمىسى قالاي جۇرگىزىلىپ جاتىر
«بۇقتىرما سۋ قويماسى ارقىلى وتەتىن كوپىر قۇرىلىسى بويىنشا بيىل ءساۋىر ايىنىڭ سوڭىنا دەيىن رەسپۋبليكالىق بيۋدجەتتەن قارجىلاندىرۋ ناقتىلاناتىنىن حابارلايمىن. 2017 -جىلدىڭ 7 - جەلتوقسانىندا 01-0613/17 ءنومىرلى مەملەكەتتىك ساراپتاما ناتيجەسى الىنعان جوبالىق- سمەتالىق قۇجاتتاماعا ساي جوبانىڭ قۇنى - 32 ميلليارد تەڭگە. سونداي- اق، جەرگىلىكتى بيۋدجەتتەن مەردىگەر مەكەمەنى انىقتاۋ ماقساتىندا بايقاۋ شارالارىن وتكىزۋگە ءتيىستى قارجى قاراستىرىلىپ وتىر»، - دەپ جازدى اكىم Facebook-تەگى پاراقشاسىندا.
دانيال احمەتوۆتىڭ مالىمدەۋىنشە، قازىرگى تاڭدا پاروم ساعات 07.00-دەن 21.00-گە دەيىن كەستەگە ساي قىزمەت ەتۋدە. مۇزدىڭ قالىڭدىعى 5-7 سانتيمەتر، اۆتوكولىك قوزعالىسىن شەكتەۋ ءۇشىن كۇزەت قويىلعان. ⠀
«ءوڭىر تۇرعىندارىن ءوزىنىڭ جانە وزگەنىڭ ومىرىنە جوعارى جاۋاپكەرشىلىكپەن قاراۋعا شاقىرامىن!» - دەپ جازدى اكىم.
ەسكە سالا كەتسەك، بىلتىر مەملەكەت باسشىسى ۇكىمەتكە شىعىس قازاقستان وبلىسىنىڭ اكىمدىگىمەن بىرگە بۇقتىرما سۋ قويماسى ارقىلى كوپىر سالۋ ءۇشىن قارجى ءبولۋ ماسەلەسىن قاراستىرۋدى تاپسىرعان بولاتىن.
اۆتور ايان بەكەن ۇلى
