قىتايدىڭ ۋحان قالاسىندا پايدا بولعان وبادان قازاقستانعا قاۋىپ بار ما
ەلگە سىرتتان كەلەتىن جولاۋشىلار مەن وزگە دە ماقساتتاعى شەتەل ازاماتتارىنا باقىلاۋ كۇشەيتىلدى. ول ءۇشىن شەگارالىق بەكەتتەرگە تەپلوۆيزورلار مەن ارنايى پيرومەتر قوندىرعىلارى ورناتىلعان.
بۇل تۋرالى Azattyq Rýhy ءتىلشىسىنىڭ ساۋالىنا ق ر دەنساۋلىق ساقتاۋ مينيسترلىگى تاۋارلار مەن كورسەتىلەتىن قىزمەتتەردىڭ قاۋىپسىزدىگىن باقىلاۋ كوميتەتىنىڭ باسپا ءسوز قىزمەتىنىڭ جاۋابىندا ايتىلدى.
«قازاقستان شەكاراسى ارقىلى قانداي دا ءبىر جۇقپالى اۋرۋدىڭ تاراماۋى ءۇشىن ادامدار مەن تاۋارلاردىڭ ەل شەكاراسىنان ءوتۋى قاتاڭ باقىلانادى. جولاۋشىلار تەرمومەتريالىق تەكسەرۋدەن ءوتىپ، كۇدىككە ىلىنگەن جاعدايدا سول جەردە مەديتسينالىق تەكسەرۋدەن وتكىزىلەدى. حالىقارالىق تالاپتارعا ساي شەتەلدە جۇمىس ىستەيتىن قازاقستان ەلشىلىگىنىڭ قىزمەتكەرلەرى بەكىتىلگەن ءتارتىپ اياسىندا وزدەرىنە جۇكتەلگەن مىندەتتەردى اتقارىپ جاتىر. قازاقستاننىڭ قۇس تۇماۋى، شوشقا تۇماۋى جانە ءتۇرلى پنيەۆمونيالارعا قاتىستى جۇقپالى ەپيدەميا كەزىندە جۇمىس ىستەۋ تاجىريبەسى قالىپتاسقان»، - دەيدى كوميتەتتىڭ رەسمي وكىلى ەرجان بايتانايەۆ.
قىتايدان قازاقستانعا قاتىنايتىن حالىقارالىق رەيستەر كەستەگە ساي ۇشىپ جاتىر. نۇر-سۇلتان حالىقارالىق اۋەجايىنا بەيجىڭ، سانيا، گۋاڭجوۋ جانە ءۇرىمجى قالالارىنان ۇشاقتار قاتىنايدى. ال الماتى قالاسىنا بەيجىڭ، حانكوۋ، ءۇرىمجى، شيان، سانيا قالالارىنان تىكەلەي رەيستەر تىركەلگەن. ودان تىس نۇر-سۇلتان- ءۇرىمجى باعىتىمەن «دوستىق» بەكەتى ارقىلى تەمىرجولمەن اپتاسىنا ءبىر رەت جولاۋشىلار پويىزى قاتىنايدى. ال بەز وباسىنىڭ وشاعى سانالاتىن ۋحاننان تىكەلەي اۋە نەمەسە تەمىرجول قاتىناسى جوق.
الماتى قالالىق تاۋارلار مەن كورسەتىلەتىن قىزمەتتەردىڭ قاۋىپسىزدىگىن باقىلاۋ دەپارتامەنتىنىڭ باسشىسى ايزات مولداعاسىموۆانىڭ ايتۋىنشا، د د ۇ مالىمەتتەرىندە 2019 -جىلى الەمدە 86 وبا دەرتىنە شالدىققان ادام انىقتالعان.
«ونىڭ ىشىندە 32 جاعداي ولىممەن اياقتالعان. ماداگاسكاردا- 46، قىتايدا-4، موڭعوليادا-2، كونگو رەسپۋبليكاسىندا- 31، ۋگاندا ەلىندە-2، ا ق ش-تا 1 جاعدايداي تىركەلگەن. وسىلاردىڭ ىشىندە ەڭ ادامنىڭ كوپ ءولۋ جاعدايى ماداگاسكار مەن موڭعوليادا ورىن السا، قىتايدا وبادان ادام ولمەگەن»، - دەيدى ايماقتىق دەپارتامەنتتىڭ باسشىسى.
ال ۋحاندا تىركەلگەن بەز وباسىنىڭ پنيەۆمونيالىق سيپات الۋى راس. ول قاندالا ارقىلى كەمىرگىشتەرگە بەرىلەدى، ال كەمىرگىشتەر ادامدار اراسىندا تاراتاتىن جۇقپالى اۋرۋدىڭ فورماسى. قازاقستاندا وبانىڭ بىرنەشە وشاعى بار.
«الايدا وتكەن عاسىردىڭ باسىنان بەرى ەلىمىزدىڭ اۋماعىندا مۇنداي قاۋىپتى جۇقپالى دەرتتەن زارداپ شەككەن جاعدايلار تىركەلگەن جوق»، - دەيدى ەپيدەميولوگ.
ايتا كەتەيىك كەشەلى بەرى الەمدىك اقپارات قۇرالدارى، سونىڭ ىشىندە ر ي ا اقپارات اگەنتتىگى قىتايدىڭ ۋحان ايماعىندا قاۋىپتى ۆيرۋستىڭ ادام ومىرىنە قاۋىپ ءتوندىرىپ جاتقانىن جازدى. باسىلىم وبادان 300 ادامنىڭ ولگەنى تۋرالى دەرەكتەر كەلتىرەدى. نەگىزىنەن كەمىرگىشتەر ارقىلى تارايتىن جۇقپالى دەرتتەن 2003 -جىلى قىتايدا 800 ادام ءولىپ، بيلىك 3،5 ميلليون ەگەۋقۇيرىقتىڭ كوزىن جويعان دەگەن اقپاراتتار تاراپ جاتىر.
