قازاقستان قۇراماسى توكيو وليمپياداسىندا قانداي سپورتتىق كيىم كيەدى؟
14- قازان كۇنى قازاقستان ۇ و ك 2020-جىلى توكيو وليمپياداسىنا قاتىساتىن قازاقستان ۇلتتىق قۇراما كومانداسىنىڭ پارادتىق جانە سپورتتىق كيىم ۇلگىسىنىڭ ديزاينىنا اشىق كونكۋرس باستالعانىن جاريالاعان بولاتىن.
ناتيجەسىندە 19 قاتىسۋشى جۇمىسىن جىبەرىپ، ولار ۇ و ك سايتىنا شىعارىلدى. جەڭىمپازداردى ارنايى كوميسسيا قۇرامى انىقتادى. ونىڭ قۇرامىنا قازاقستان ۇ و ك سپورت ديرەكتسياسى مەن ۇلتتىق پاراليمپيادالىق كوميتەتىنىڭ وكىلدەرى، قازاقستان ۇ و ك سپورتشىلار كوميسسياسىنىڭ مۇشەلەرى كىردى.
كوميسسيانىڭ قورىتىندى وتىرىسى بويىنشا «КазСПО -N» ج ش س Zibroo Active Sportswear «سپورتتىق فورما» جانە «Marino Madi» و و و «پارادتىق فورما» جەڭىمپاز دەپ تانىلدى.
بايقاۋ جەڭىمپازدارى اراسىندا وليمپيادالىق فورما ديزاينىنىڭ، تەحنولوگيالىق تالاپتارىنىڭ (ماتا، كەرەك-جاراقتار، گيگروسكوپيا، مەملەكەتتىك رامىزدەردى قولدانۋ جانە ت. ب.) تۇپكىلىكتى تۇجىرىمداماسى بويىنشا ودان ءارى جۇمىس جۇرگىزىلەتىن بولادى.
پارادتىق جانە سپورتتىق كيىم ۇلگىسىن بەكىتۋ ءۇشىن قازاقستاننىڭ وليمپيادالىق قۇراما كومانداسىنىڭ وكىلدەرىنەن تۇراتىن ارنايى كوميسسيا قۇرىلادى.
«كوميسسيا وتە جاقسى جۇمىس ىستەدى. كونكۋرسقا قاتىسۋشىلار وليمپيادالىق فورمانىڭ ءبىر ەمەس، بىرنەشە ديزاين نۇسقاسىن ۇسىندى. قاتىسۋشىلاردىڭ بارلىعى قازاقستاندىق ديزاينەرلەر بولدى. ءبىز ءۇشىن بۇل وتە قۋانىشتى جاعداي. سەبەبى، وليمپيادالىق فورمانى دايىنداۋدا وتاندىق مامانداردىڭ ونىمدەرىن قولداۋ ءبىزدىڭ باستى ماقساتىمىز بولاتىن.
ايتا كەتەرلىگى، تاڭدالعان جۇمىستار ح و ك- تىڭ بارلىق تالاپ-نۇسقالارىنا سايكەستەندىرىلىپ ءالى دە جەتىلدىرىلەدى. ال سوڭعى شەشىمدى 2020-جىلى توكيودا وتەتىن جازعى وليمپيادا ويىندارىنا قاتىساتىن سپورتشىلاردىڭ وزدەرى تاڭدايتىن بولادى»، - دەيدى ۇ و ك رەسمي وكىلى جىگەر ازبەرگەنوۆ.
قازاقستان ۇلتتىق قۇراما كومانداسىنىڭ وليمپيادالىق فورماسىنىڭ ديزاينى بيىل جازدا قازاقستان ۇ و ك رەسمي تانىستىرىلىمىندا كورسەتىلەتىن بولادى.
